ഓർമ്മയിലെ കൊന്നമരങ്ങൾ

     വിഷു വരുന്നു എന്ന് എന്നെപ്പോലുള്ളവർ അറിയുന്നത് എവിടെയെങ്കിലും ഒക്കെ പൂത്ത് നിൽക്കുന്ന കൊന്നമരം കാണുമ്പോഴാണ്. ഇപ്പോൾ കാലാവസ്ഥാ വ്യതിയാനം കാരണമാണോ അതോ ജനിതകമാറ്റം വരുത്തിയതോ എന്നറിയില്ല ഓണം കഴിഞ്ഞാൽ തന്നെ പൂക്കുന്ന കൊന്നകൾ കാണാം. അതിനാൽ വിഷു വരുന്നു എന്നതിന് പകരം വിഷു വരും എന്നാണ് കൊന്നകൾ ഇപ്പോൾ ഓർമ്മിപ്പിക്കുന്നത്. എൻ്റെ മനസ്സിൽ മായാതെ ഇടം പിടിച്ച ചില കൊന്നമരങ്ങളെപ്പറ്റിയാവട്ടെ ഇപ്രാവശ്യത്തെ വിഷു പോസ്റ്റ് .

കൊന്ന എന്ന് കേൾക്കുമ്പോഴും ഏത് കൊന്ന പൂത്തത് കാണുമ്പോഴും പതിനൊന്ന് വർഷം മുമ്പ് അന്തരിച്ച എൻ്റെ പിതാവ് എൻ്റെ മനസ്സിൽ ഓടിയെത്തും. ഞാനും എൻ്റെ പ്രിയ പിതാവും കൂടി കോഴിക്കോട്ടെ ഒരു എക്സിബിഷനിൽ നിന്ന് കൊണ്ടുവന്ന കൊന്നത്തൈ തറവാട് വീടിൻ്റെ മുറ്റത്ത് തന്നെ വച്ചു. നാലഞ്ച് വർഷം കൊണ്ട് തന്നെ അത് വളർന്ന് വലുതായി പൂത്തുലഞ്ഞു. എല്ലാ വർഷവും മാർച്ച് പകുതി മുതൽ മെയ് പകുതി വരെ ഞങ്ങളുടെ മുറ്റം സ്വർണ്ണവർണ്ണമായിരുന്നു. കണി ഒരുക്കാൻ നിരവധി പേർ കൊന്നപ്പൂ കൊണ്ട് പോകാറുമുണ്ടായിരുന്നു.

ഏതാണ്ട് ഇതേ സമയത്ത് തന്നെയാണ് അമ്മാവൻ്റെ വീട്ട് മുറ്റത്തും ഒരു കൊന്നത്തൈ നട്ടതും വളർന്ന് പൂവിട്ടതും. മെയിൻ റോഡ് സൈഡിൽ തന്നെയായതിനാൽ സ്വആ മരത്തിൽ നിന്നും നിരവധി പേർ പുക്കളിറുക്കാറുണ്ടായിരുന്നു. വസ്തു ഭാഗം വയ്ക്കൽ കഴിഞ്ഞപ്പോൾ അമ്മാവൻ സ്ഥലം വിറ്റു.അതോടെ ആ കൊന്നയും ഇല്ലാതായി. ബാപ്പയുടെ മരണ ശേഷം ഞങ്ങളുടെ സ്വത്തും ഭാഗം വച്ചു. തറവാട് വീട് അനിയൻ പൊളിച്ച് പുതുക്കിപ്പണിതതോടെ ഞങ്ങളുടെ കൊന്നമരവും കഥാവശേഷമായി.

കോഴിക്കോട് ഗവ. എഞ്ചിനീയറിംഗ് കോളജിൽ ജോയിൻ ചെയ്തതിൻ്റെ പിറ്റേ വർഷത്തെ പരിസ്ഥിതി ദിനത്തിൽ കാമ്പസിൽ വിവിധ മരങ്ങൾ നട്ടുപിടിപ്പിക്കുന്ന കൂട്ടത്തിൽ എൻ്റെ ഡിപ്പാർട്ട്മെൻ്റിൻ്റെ മുമ്പിൽ ഒരു കൊന്ന ത്തൈ നട്ടിരുന്നു. വളണ്ടിയറായ അഫ്നാസ് ആയിരുന്നു തൈ നട്ടത്. അന്നത്തെ മുഖ്യാതിഥി മരത്തെ അഫ്നാസ് മരം എന്ന് വിളിച്ചു. വർഷങ്ങളായി അതും നേരത്തെ പൂക്കുന്നു.

2012 മെയ് മാസത്തിൽ ദേശീയോദ്ഗ്രഥന ക്യാമ്പിൽ പങ്കെടുക്കാനായി എൻ്റെ കോളേജിലെ 10 NSS വളണ്ടിയർമാരെയും കൊണ്ട് പോണ്ടിച്ചേരിയിൽ പോയിരുന്നു. ക്യാമ്പ് കഴിഞ്ഞ് നഗരം കാണാനായി ഇറങ്ങിയപ്പോൾ ഒരു തെരുവിൽ പൂത്തുലഞ്ഞ് നിന്ന കൊന്നമരം ഇന്നും മനസ്സിൽ മായാതെ നിൽക്കുന്നു.

           പുത്തുലഞ്ഞ കൊന്നമരങ്ങൾ തരുന്നത് ഇങ്ങനെ പലതരം ഓർമ്മകളാണ്. ലോ ക്ക് ഡൗൺ കാരണം ഇപ്രാവശ്യം കാണാനായത് അരീക്കോട് പോലീസ് സ്റ്റേഷനിലെ കൊന്നമരം മാത്രമാണ്. ഓർമ്മകൾ എന്നിട്ടും മനസ്സിൽ ഇരമ്പി എത്തുന്നു.

എല്ലാവർക്കും വിഷു ആശംസകൾ (ഒരു പഴയ വിഷു ഓര്‍മ്മ  ഇവിടെ)