എന്റെ ആദ്യരാത്രി

             പുറത്ത് ഇരുട്ട് വ്യാപിച്ച് തുടങ്ങി.കാറ്റിന്റെ ശക്തി കൂടിക്കൂടി വരുന്നത് ജനല്‍ ചില്ലിന്റെ പ്രകമ്പനങ്ങളില്‍ നിന്ന്  ഞാന്‍ തിരിച്ചറിയുന്നുണ്ടായിരുന്നു.ചിവീടുകള്‍ ഐക്യകണ്ഠേന ശബ്ദം പുറപ്പെടുവിച്ചപ്പോള്‍ ഞാന്‍ കണ്ട മഹിളാസമാജങ്ങള്‍ പോലും അവക്ക് മുന്നില്‍  തോറ്റുപോയി. കാറ്റിന്റെ ശീല്‍ക്കാരം കൂടിക്കൂടി വരുന്നത് മഴയുടെ മുന്നറിയിപ്പായിരുന്നു എന്ന് അല്പ സമയത്തിനകം മനസ്സിലായി.മഴയും കാറ്റും കൂടി ജനലിന്റെ വിടവില്‍ കൂടി റൂമിലേക്ക് എത്തി നോക്കി – എന്റെ ആദ്യരാത്രി കാണാന്‍ !!

           പതിവിന് വിപരീതമായി ഞാന്‍ തന്നെയാണ് രാത്രിഭക്ഷണം തയ്യാറാക്കിയത് – മനുഷ്യ ചരിത്രത്തില്‍ തന്നെ  അത് , ആദ്യരാത്രിയിലെ ഒരു പുത്തന്‍ സംഭവമായിരിക്കും.സ്വയം പാകം ചെയ്തതായതിനാല്‍ ഭക്ഷണത്തിന് നല്ല രുചി തോന്നി. പുറത്ത് നിന്നുള്ള തണുപ്പും കൂടി ആദ്യരാത്രി  ആഘോഷിക്കുന്ന റൂമിലേക്ക് തള്ളിക്കയറാന്‍ തുടങ്ങിയതോടെ ഞാന്‍ മെല്ലെ കട്ടിലിലേക്ക് നീങ്ങി.അന്നത്തെ തിരക്ക് കാരണം അലങ്കോലമായിക്കിടന്ന ബെഡ്ഡിലേക്ക് ഞാന്‍ മെല്ലെ ഇരുന്നു.ലൈറ്റ് ഓഫ് ചെയ്ഹതോടെ റൂമില്‍ പരസ്പരം കാണാനാവാത്ത ഇരുട്ട് പടര്‍ന്നു.ശേഷം സംഭവിച്ചത് എല്ലാ മനുഷ്യജീവിതത്തിലും സംഭവിക്കുന്നത് തന്നെയായതിനാല്‍ ഞാന്‍ വിവരിക്കുന്നില്ല. സോറി, അത് സുന്ദരമായ ഒരുറക്കമായിരുന്നു.

                ഇന്ന് സൂര്യന്‍ കിഴക്കുദിച്ചതോടെ , ആറ് വര്‍ഷത്തിന് ശേഷം മാനന്തവാടിയിലെ എന്റെ  ഏകാന്ത ആദ്യരാത്രി സുന്ദരമായി അവസാനിച്ചു !!!