ഒരു വോട്ടെണ്ണൽ വീരഗാഥ

ഇതുവരെയുള്ള സർക്കാർ സർവീസിൽ ഇലക്ഷൻ ഡ്യൂട്ടി എത്ര എണ്ണം കിട്ടി എന്ന് ചോദിച്ചാൽ പെട്ടെന്ന് ഉത്തരം കിട്ടാത്ത അത്രയും ആയിട്ടുണ്ട്. ഞാൻ സർക്കാർ സേവനം ആരംഭിച്ചത് മൃഗസംരക്ഷണ വകുപ്പിലായിരുന്നു. പ്രസ്തുത വകുപ്പ് അവശ്യ സർവീസിൽ പെടുന്നത് ആയതിനാലും ആ സർവീസിന്റെ പകുതി ഭാഗവും ഞാൻ ലീവിൽ ആയതിനാലും അക്കാലയളവിൽ നിയമസഭാ തെരഞ്ഞെടുപ്പും ലോകസഭാ തെരഞ്ഞെടുപ്പും നടന്നിട്ടും  ഡ്യൂട്ടി കിട്ടിയിരുന്നില്ല.അല്ലെങ്കിലും അന്നെല്ലാം ഇലക്ഷൻ ഡ്യൂട്ടിയും സെൻസസ് ഡ്യൂട്ടിയും അദ്ധ്യാപകർക്ക് മാത്രം അറിയാവുന്ന ഒരു പണിയായിരുന്നു. 

2000 ൽ നടന്ന പഞ്ചായത്ത് ഇലക്ഷൻ മുതലാണെന്ന് തോന്നുന്നു അദ്ധ്യാപകർക്ക് പുറമെ മറ്റു ഡിപ്പാർട്ട്മെന്റിൽ നിന്നുള്ളവരും ഇലക്ഷൻ ഡ്യൂട്ടിക്ക് നിയോഗിക്കപ്പെട്ട് തുടങ്ങിയത്.എനിക്ക് ആദ്യമായി ഇലക്ഷൻ ഡ്യൂട്ടി കിട്ടുന്നതും ആ വർഷത്തിൽ ആയിരുന്നു. മഞ്ചേരി കെ.എസ്.ഇ.ബി ഓഫീസിൽ കാഷ്യർ ആയിരിക്കെയാണ് കിഴിശ്ശേരിക്കടുത്ത് ആലിൻചുവട് സ്‌കൂളിൽ ആദ്യമായി ഡ്യൂട്ടിക്ക് നിയോഗിക്കപ്പെട്ടത്.ശേഷം വന്ന എല്ലാത്തരം ഇലക്ഷനിലും ഡ്യൂട്ടി ലഭിക്കാതെ പോയത് വളരെ വിരളമാണ്.കാരണം 2004ൽ കെ.എസ്.ഇ.ബി വിട്ട    ഞാനും ഇലക്ഷൻ ഡ്യൂട്ടി കുത്തകയാക്കിയ അദ്ധ്യാപക ഗണത്തിലായി.

ഇതുവരെ ചെയ്ത ഓരോ ഇലക്ഷൻ ഡ്യൂട്ടിയും വ്യത്യസ്തങ്ങളും സംഭവ ബഹുലങ്ങളും ആയിരുന്നു.ഇപ്പോൾ ഏറ്റവും അവസാനമായി ചെയ്ത ഡ്യൂട്ടി 2021 നിയമസഭാ ഇലക്ഷന്റെ കൗണ്ടിംഗ് സൂപ്പർവൈസിംഗ് ആയിരുന്നു.ഇതിനായി  ഒരു ഓൺലൈൻ ക്ലാസും, കോവിഡ് ഭീഷണി വളരെ അധികമായിട്ടും അതേ കാര്യങ്ങൾ തന്നെ ഒരു ഓഫ്‌ലൈൻ ക്ലാസും ആയി നൽകിയത് എനിക്ക് ആദ്യത്തെ അനുഭവമാണ്. ഡ്യൂട്ടിക്ക് നിയോഗിക്കപ്പെട്ടവർ  കോവിഡ് പ്രതിരോധ വാക്സിൻ എടുത്തിരിക്കണമെന്ന് പറഞ്ഞിരുന്നു. അത് പ്രായോഗികമല്ല എന്നതിനാലായിരിക്കും 72 മണിക്കൂറിനകം എടുത്ത ആർ.ടി.പി.സി.ആർ ടെസ്റ്റ് മതി എന്നായി പിന്നീടുള്ള നിർദ്ദേശം.മൂന്ന് ലൊക്കേഷനുകളിൽ കയറി ഇറങ്ങിയ ശേഷമാണ് എനിക്കും സുഹൃത്തിനും ടെസ്റ്റ് തരമായത്. അതിന്റെ റിസൾട്ടും കൃത്യ സമയത്ത് കിട്ടില്ല എന്ന് ബോധ്യം വന്നപ്പോൾ തലേ ദിവസം നടത്തിയ ആന്റിജൻ ടെസ്റ്റ് റിസൾട്ടും സ്വീകാര്യമാണെന്ന് ഉത്തരവെത്തി. അതുപ്രകാരം എന്റെ നാട്ടിലെ താലൂക്ക് ആശുപത്രിയിൽ എത്തി അതും ചെയ്തു.

കൗണ്ടിംഗിന്റെ തലേദിവസം റാൻഡമൈസേഷൻ എന്ന എന്തോ ഒരു പ്രക്രിയ നടത്തിയപ്പോൾ, സഹപ്രവർത്തകരായ മിക്ക ലേഡി സ്റ്റാഫും ജില്ലയുടെ ബൗണ്ടറി ലൈനിൽ എത്തിയപ്പോൾ എനിക്ക് ക്രീസ് വിട്ട് പോകേണ്ടി പോലും വന്നില്ല.എനിക്ക്  ഡ്യൂട്ടി കിട്ടിയത് എലത്തുർ മണ്ഡലത്തിന്റെ കേന്ദ്രമായ എന്റെ കോളേജിന്റെ തൊട്ടടുത്ത സ്ഥാപനമായ ഗവൺമെൻറ് പോളിടെക്‌നിക്കിൽ ! രാവിലെ ആറ് മണിക്ക് ഹാജരാകണം എന്ന നിർദ്ദേശം വെറും ഒരു മണിക്കൂർ മാത്രം തെറ്റിച്ച് ഏഴ് മണിക്ക് ഞാൻ റിപ്പോർട്ട് ചെയ്തു.അപ്പോഴും അവസാന റാൻഡമൈസേഷൻ കഴിഞ്ഞിരുന്നില്ല. അതിനാൽ അഞ്ച് മണിക്ക് എത്തിയവനും ഏഴ് മണിക്ക് എത്തിയവനും എല്ലാം ഭക്ഷണം ശരിക്ക് കഴിക്കാത്തതിനാൽ തുല്യ ദു:ഖിതർ ആയിരുന്നു. ഞാൻ നോമ്പ് നോറ്റിരുന്നതിനാൽ ആ ദു:ഖത്തിൽ എനിക്ക് പങ്കുണ്ടായിരുന്നില്ല.

സമയം 7 .20 ആയപ്പോൾ കൗണ്ടിംഗ് സൂപ്പർവൈസർമാരുടെ ഫൈനൽ റാൻഡമൈസേഷൻ കഴിഞ്ഞ് ടേബിൾ മാർക്കിംഗും ടീം സെറ്റിങ്ങും കഴിഞ്ഞു.കൗണ്ടിംഗ് സൂപ്പർവൈസറും കൗണ്ടിംഗ് അസ്സിസ്റ്റന്റും മൈക്രോ ഒബ്സർവറും അടങ്ങിയ മൂന്നംഗ സംഘങ്ങൾ ഓരോന്നോരോന്നായി  വിവിധ ഹാളിലെ വിവിധ ടേബിളിലേക്കായി നീങ്ങിത്തുടങ്ങി.ഓരോ ടീമിനെ വിളിക്കുമ്പോഴും അടുത്തത് ഞാൻ എന്ന പ്രതീക്ഷ ഉണ്ടായെങ്കിലും ഫൈനൽ റാൻഡമൈസേഷനിൽ ഞാൻ സ്റ്റേഡിയത്തിന് പുറത്തായിരുന്നു പതിച്ചത് എന്ന് വൈകിയാണ് മനസ്സിലായത്. അതോടെ ഇത് വരെയുള്ള സർക്കാർ സർവീസിൽ ആദ്യമായി കൗണ്ടിംഗ് റിസർവേഷൻ ഡ്യൂട്ടിയിലായി.

അങ്ങനെ , മീഡിയ റൂം എന്ന പേരിൽ സജ്ജീകരിച്ച ഒരു പന്തലിൽ ബിഗ് സ്‌ക്രീനിൽ ചാനൽ 24 ന്റെ അരുണും വിജയനും എസ്.കെയും നടത്തിയ കൗണ്ടിംഗ് ലൈവ് (കോമഡി) ഷോ ആസ്വദിച്ച്  ഞാനും പേരറിയാത്ത കുറെ പേരും ഇരുന്നു.രണ്ടര മണിയോടെ, അച്ചടക്കത്തോടെ ഇരുന്നതിനുള്ള പ്രതിഫലമായി 600 രൂപയും കിട്ടി ! അകത്ത് വോട്ട് എണ്ണിയവനും കൊടുത്തത് അത് തന്നെയായിരുന്നു. അങ്ങനെ പുതിയൊരു അനുഭവം സമ്മാനിച്ചുകൊണ്ട് ഈ ഇലക്ഷൻ ഡ്യൂട്ടിയും പര്യവസാനിച്ചു.അടുത്ത അനുഭവത്തിനായി ഇനി 2024 നെ പ്രതീക്ഷയോടെ കാത്തിരിക്കുന്നു.