മൊബൈലില് എസ്.എം.എസ് വന്നാല് പെട്ടെന്ന് നോക്കുന്നത് എന്റെ പതിവാണ്.കാരണം എനിക്കത് കിട്ടുന്നത് വളരെ കുറവാണ് എന്നത് തന്നെ.രണ്ട് ദിവസം മുമ്പ് നോമ്പ് തുറക്കാന് നിമിഷങ്ങള് ബാക്കി നില്ക്കേ വന്ന എസ്.എം.എസ് എന്നെ തികച്ചും അസ്വസ്ഥനാക്കി.അതിന്റെ ചുരുക്കം ഇതായിരുന്നു.
“10/8/11 നിങ്ങളുടെ അക്കൌണ്ടിലെ അവൈലബ്ള് ബാലന്സ് 1000 രൂപ” അയച്ചത് സി.ബി.ഐ ഫ്രം എസ്.ബി.ഐ!!!
“ങേ!!!!” ഞാന് ഞെട്ടി.കാരണം ഒരാഴ്ച മുമ്പ് എനിക്ക് കിട്ടിയ എസ്.എം.എസ് പ്രകാരം ഈ അവൈലബ്ള് പി.ബി (പ്രീവിയസ് ബാലന്സ്)എണ്ണായിരത്തി കുറേ രൂപ ആയിരുന്നു.അതിന് ശേഷം ഒരു വിധ ട്രാന്സാക്ഷനും നടത്താതെ ഒരാഴ്ച കൊണ്ട് അത് സ്വര്ണ്ണ വില പോകുന്നതിന്റെ നേരെ ഓപ്പോസിറ്റില് പോയതിന്റെ ഗുട്ടന്സ് അറിയാതെ ഞാന് അമ്പരന്നു.
ബാങ്ക് സമയം കഴിഞ്ഞതിനാല് അങ്ങോട്ട് വിളിക്കാന് വയ്യാത്ത അവസ്ഥ ആയിരുന്നു.ഇല്ല എങ്കില് മാനേജറെ വിളീച്ച് എവിടേ നോക്കിയാടോ ഈ “അവൈലബ്ള്“ വിടുന്നത് എന്ന് ചോദിക്കാമായിരുന്നു.അതിനു മുമ്പ് എന്റെ എ.ടി.എം കാര്ഡ് എന്റെ കയ്യില് തന്നെ ഉണ്ട് എന്ന് ഞാന് ഉറപ്പ് വരുത്തി.ഏതായാലും അടുത്ത ദിവസം തന്നെ മാനേജറേ കണ്ട് പറയാനുള്ള തെറികള് പ്രിപ്പേര് ചെയ്യാന് സമയം തന്നതില് ബാങ്കിനെ ഞാന് നമിച്ചു.
എസ്.ബി.ഐയില് ഞാന് അക്കൌണ്ട് തുടങ്ങിയ ദിനം പെട്ടെന്ന് എന്റെ ഓര്മ്മയില് വന്നു. കൌണ്ടറിലിരുന്ന ഒരു പെണ്ണ് ചോദിച്ചു.
“സാര്...മൊബൈല് ബാങ്കിംങ്ങ് ഫസിലിറ്റി വേണ്ടേ?”
ഈ ആധുനികയുഗത്തില് മൊബൈല് ബാങ്കിംങ്ങ് സൌകര്യം ഒഴിവാക്കിയാലുണ്ടാകുന്ന ബുദ്ധിമുട്ടുകള് മനസ്സില് വന്നെങ്കിലും അതുണ്ടായാലുള്ള ഒരു ബുദ്ധിമുട്ടും മനസ്സില് വന്നില്ല.അതല്ലെങ്കിലും അങ്ങനെത്തന്നെ ആയിരിക്കുമല്ലോ.അതുകൊണ്ട് ഞാന് അതിന് സമ്മതം മൂളി.ഒരു ഇരയെ വീഴ്ത്തിയതിന്റെ കോഡ് ഭാഷയിലുള്ള ചില ആംഗ്യങ്ങള് ഈ കൌണ്ടറില് നിന്നും തൊട്ടടുത്ത കൌണ്ടറിലെ പെണ്ണിലേക്ക് പായുന്നത് ഞാന് നോക്കി നിന്നു.
ദിവസങ്ങള്ക്ക് ശേഷം ഈ എസ്.ബി.ഐ-സി.ബി.ഐ യില് നിന്നും മെസേജുകള് വരാന് തുടങ്ങി.പല മെസ്സേജുകള്ക്കും മറുപടി നല്കി എന്റെ മൊബൈല് ബാലന്സും കൂപ്പുകുത്തി എന്നല്ലാതെ എനിക്ക് ഇതുവരെ ഒരു ഗുണവും കിട്ടിയില്ല.ഇപ്പോളിതാ എസ്.ബി.ഐ ബാലന്സും കൂപ്പുകുത്തിയിരിക്കുന്നു!ഇപ്രകാരം പോയാല് താമസിയാതെ ഞാന് അങ്ങോട്ട് കാശ് കൊടുക്കേണ്ട ഒരു സ്ഥിതി വരും എന്നതിനാല് തെറിയഭിഷേകം കഴിഞ്ഞ് നാളെത്തന്നെ അവിടത്തെ സകല ഇടപാടുകളും നിര്ത്താനും ഞാന് തീരുമാനിച്ചു.
പെട്ടെന്ന് എന്റെ മൊബൈല് റിംഗ് ചെയ്തു.‘ഇനി ഫോണ് വഴിയും വിളീച്ചു പറയുന്നുണ്ടോ , എങ്കില് ഇന്നത്തെ ഡോസ് ഇന്നുതന്നെ കൊടുക്കാം‘ എന്ന് കരുതി ഞാന് ഫോണ് എടുത്തു.
“ആപാ...ഇത് ഞാനാ...” അപ്പുറത്ത് നിന്നും അനന്തിരവന്റെ ശബ്ദം.
“ങാ...എന്താ ഈ നേരത്ത് ?” ക്ഷമകെട്ട് ഇരിക്കുന്ന ഞാന് ചോദിച്ചു.
“ഒന്നുമില്ല...ഞാന് ഇവിടെ എസ്.ബി.ഐയില് ഒരു അക്കൌണ്ട് തുടങ്ങിയിട്ടുണ്ട്.ആപയുടെ ഫോണ് നമ്പറാ അതില് കൊടുത്തത്.അക്കൌണ്ട് ആക്ടിവേറ്റ് ആയാല് നിങ്ങള്ക്ക് മെസേജ് വരും...”
“യാ കുദാ!!!”
എസ്.ബി.ഐയില് നിന്നുള്ള ആ മെസേജ് ബാങ്ക് സമയം കഴിഞ്ഞ് എത്തിയതില് ഞാന് ദൈവത്തെ സ്തുതിച്ചു.ഇല്ലായിരുന്നുവെങ്കില് ഉണ്ടാകുമായിരുന്ന പൊല്ലാപ്പുകള് എന്തൊക്കെയായിരുന്നു.ഒരു പക്ഷേ പിറ്റേ ദിവസം വാര്ത്തയില് നിറഞ്ഞു നില്ക്കുന്നതും ഞാന് ആയി മാറിയേനെ.അനന്തിരവന്മാരായാല് ഇങ്ങനെയും ഓരോ കുന്ത്രാണ്ടങ്ങള് ഒപ്പിച്ചു വയ്ക്കണം.അമ്മാവന്മാരേ, ജാഗ്രതൈ!!!
Showing posts with label മൊബൈല്ഫോണ് പൊല്ലാപ്പുകള്. Show all posts
Showing posts with label മൊബൈല്ഫോണ് പൊല്ലാപ്പുകള്. Show all posts
Sunday, August 14, 2011
Thursday, August 28, 2008
അഴീക്കോട്ടെ സാബു
എന്റെ സുഹൃത്തുക്കളില് പലര്ക്കും മൊബൈല്ഫോണ് കണക്ഷന് കിട്ടിയ ശേഷമാണ് എനിക്ക് അതിന്റെ ആവശ്യകത മനസ്സിലായതും ഞാന് കണക്ഷന് എടുത്തതും.കണക്ഷന് കിട്ടിയ ദിവസം തന്നെ പുത്തന് കളിപ്പാട്ടം കിട്ടിയ കുട്ടിയെപ്പോലെ ഞാന് മൊബൈലില് തന്നെ കളിച്ചുകൊണ്ടിരുന്നു. എനിക്ക് ഫോണ് നമ്പര് അറിയാവുന്ന സുഹൃത്തുക്കളെയെല്ലാം വിളിച്ച് എന്റെ മൊബൈല് നമ്പര് നല്കുകയും "മിസ്കാള്" എന്ന പരീക്ഷണവിളി വിടാന് ആവശ്യപ്പെടുകയും ചെയ്തു.
അടുത്ത ദിവസം വൈകുന്നേരം.ഫോണ് മേശപ്പുറത്ത് വച്ച് ഞാന് ടോയ്ലറ്റില് കയറി.
"ലജ്ജാവതിയേ....നിന്റെ കള്ളക്കടക്കണ്ണില്....
ലജ്ജാവതിയേ....നിന്റെ കള്ളക്കടക്കണ്ണില്...." എന്റെ ഫോണില് നിന്നുള്ള റിംഗ്ടോണ് ഉയര്ന്നു.അതേ പോലെ നിലക്കുകയും ചെയ്തു.
'കൃത്യസമയത്ത്' തന്നെ മിസ് അടിച്ച ആ സുഹൃത്തിനെ മനസാ അഭിനന്ദിക്കുന്നതിനിടയില് 'ലജ്ജാവതി' വീണ്ടും കേള്ക്കാന് തുടങ്ങി.
ഇരുന്ന ഇരിപ്പില് നിന്ന് , പണ്ട് ആര്ക്കിമിഡീസ് യുറേക്ക യുറേക്ക എന്ന് വിളിച്ച് ഓടിയതിന് ഏകദേശം സമാനമായി ഞാന് ഫോണിനടുത്തേക്ക് ഓടി (അന്ന് സമീപത്ത് ആരും ഇല്ലാഞ്ഞത് അവരുടെയും എന്റെയും ഭാഗ്യം എന്ന് ഇന്ന് ഞാന് ഓര്ത്തുപോകുന്നു!!).ഇന്കമിംഗ് കാളിന്റെ നമ്പര് നോക്കി അറ്റന്റ് ചെയ്യുക എന്ന 'കോമണ്സെന്സ്' അന്ന് എനിക്കില്ലായിരുന്നു.അല്ലെങ്കിലും ഫോണ് കിട്ടിയതിന്റെ പിറ്റേ ദിവസം തന്നെ ആ കോമണ്സെന്സ് ആര്ക്കും ഉണ്ടാകും എന്ന് എനിക്ക് തോന്നുന്നില്ല.ഫോണ് എടുത്ത് കാള് അറ്റന്റ് ചെയ്തുകൊണ്ട് ഞാന് പറഞ്ഞു.
"ഹലോ"
"ഹലോ" മറുഭാഗത്ത് നിന്ന് ഒരു കിളിനാദം - എന്റെ ഫോണിലേക്കുള്ള ആദ്യ കിളിവിളി.
"ഹലോ ...ആരാ?" ആളെ മനസ്സിലാകാത്തതിനാല് ഞാന് ചോദിച്ചു.
"നീ ഇത്ര എളുപ്പം എന്നെ മറന്നോടാ....ഞാന് ഷിലുവാ.....ഷിലു..."
തളിപ്പറമ്പ് സർ സയ്യിദ് കോളജിൽ PG ക്ക് പഠിക്കുമ്പോൾ മറ്റൊരു ക്ലാസിൽ പഠിച്ചിരുന്ന ഷിലു.... അന്ന് ഞാന് അടുത്ത് കൂടെ നടന്ന് പോയപ്പോള് 'ദേവാ' എന്ന് വെറുതെ വിളിച്ചതിന് അവളുടെ ഡിപ്പാര്ട്ട്മന്റ് തലവിയുടെ പഴി കേട്ട ഷിലു..... ഷിലുഷാലിമാര് എന്ന പേരു കാരണം ഷാലിമാര് പെയ്ന്റിന്റെ ഉടമയുടെ മകള് എന്ന ഗര്വ്വോടെ നടന്നിരുന്ന ഷിലു.... ആ ഷിലു എനിക്ക് ഫോണ് കിട്ടി രണ്ടാം ദിവസം തന്നെ എന്നെ വിളിക്കുന്നു !! എൻ്റെ മനസ്സിൽ നിരവധി ലഡുകൾ പൊട്ടിത്തകർന്നു. '
"ഓ മൈ ഗോഡ്..... വാട്ട് എ സര്പ്രൈസ് കാള് .... ഹൗ യൂ ഗോട്ട് മൈ നമ്പര്..?" ഫോണിന്റെ മറുതലക്കല് ഷിലു എന്ന പെണ്കുട്ടി ആയതിനാല് എന്റെ നാവില് നിന്ന് ഇംഗ്ലീഷ് നുരഞ്ഞ് പൊങ്ങി.
" യെസ്, ജസ്റ്റ് എ സര്പ്രൈസ്... അനിയത്തിയുടെ കോഴ്സ് കഴിഞ്ഞോ?" അവൾ ആദ്യത്തെ ചോദ്യമെറിഞ്ഞു.
എനിക്ക് അനിയത്തി ഇല്ലാത്തതിനാല് എൻ്റെ ചെറിയ അനിയനെ ആയിരിക്കും ഉദ്ദേശിച്ചത് എന്ന മട്ടില് ഞാന് മറുപടി പറഞ്ഞു
" ഇല്ല......അവന് ഒരു സെമസ്റ്റര് കൂടി ബാക്കിയുണ്ട്...."
"കഷ്ടം...." അവളുടെ ആ മറുപടിയുടെ കാരണം എനിക്ക് പിടികിട്ടിയില്ല.
"പിന്നെ മമ്മി മരിച്ചത് പത്രത്തിലൂടെ ഞാനറിഞ്ഞു....പപ്പാ ആശുപത്രി വിട്ടോ...?"
"ങ്ഹേ!!!" വീട്ടില് ഒരു കുഴപ്പവുമില്ലാതെ ഇരിക്കുന്ന എന്റെ ഉമ്മയേയും ഉപ്പയേയും പറ്റിയുള്ള ആ വര്ത്തമാനവും ചോദ്യവും എന്നെ അക്ഷരാര്ത്ഥത്തില് ഞെട്ടിച്ചു.
"ഹലോ.....നിങ്ങള് ആരെയാ വിളിച്ചത്?" ഒരു കണ്ഫര്മേഷന് വേണ്ടി ഞാന് അവളോട് ചോദിച്ചു.
"അഴീക്കോട്ടെ സാബു അല്ലേ..?" മറുതലക്കല് നിന്ന് ചോദ്യം വന്നു.
"ഓ....സ്ഥലത്തിലും പേരിലും ചെറിയൊരു സ്പെല്ലിംഗ് മിസ്റ്റേക്ക് ഉണ്ട്.... അഴീക്കോട്ടെ സാബു അല്ല...ഇത് അരീക്കോട്ടെ ആബുവാ...." ഞാന് മറുപടി നല്കി.
"ഓ മൈ ഗോഡ് റോംഗ് നമ്പര്!!! സോറി ഫോര് ഡിസ്റ്റര്ബന്സ്..."
"ഇറ്റിസ് ഒ.കെ.... ബട്ട് കീപ് ദിസ് നമ്പര്... " എന്ന് റിക്വസ്റ്റ് ഇട്ടപ്പോഴേക്കും അവള് ഫോണ് വെച്ചു.
Posted by Areekkodan | അരീക്കോടന്
Sunday, August 17, 2008
നോക്കിയ N95-ഉം ഒരു പാവം മരമണ്ടനും - ഭാഗം മൂന്ന്
ആദ്യ ഭാഗങ്ങള് : http://abidiba.blogspot.com/2008/06/n95-2.html#links
എന്റെ NOKIA N95-ന് ഞാനും എനിക്ക് എന്റെ NOKIA N95-ഉം പരസ്പരം തലവേദനകള് ഉണ്ടാക്കിക്കൊണ്ട് കാലചക്രം മുന്നോട്ട് ഉരുണ്ട് കൊണ്ടിരുന്ന കാലത്തെ ഒരു സുപ്രഭാതം.
ഫോണെടുത്ത് ഞാന് സ്ലൈഡിംഗ് പാനല് നീക്കാന് ആരംഭിക്കവേ ഡിസ്പ്ലേ വന്നു.പെട്ടെന്ന് പാനല് സ്ലൈഡ് ചെയ്ത് അതിന്റെ യഥാര്ത്ഥ പൊസിഷനില് എത്തി.പക്ഷേ അപ്പോഴേക്കും ഡിസ്പ്ലേ ഓഫായി.ഞാന് സാധാരണ പോലെ ഫോണിന്റെ എല്ല ബട്ടണിലും അമര്ത്തി നോക്കി.നോ ഡിസ്പ്ലേ,നോ രക്ഷ.
"ങേ!!!ഫോണ് ചത്തോ ?"NOKIA N95 ആദ്യമായി എന്നെ ഞെട്ടിച്ചു.
ടച്ച് സ്ക്രീനിന്റെ കുത്താംകോല് എടുത്ത് കുത്തിയിട്ടും പഹയന് ഉണര്ന്നില്ല.അറ്റ കൈ എന്ന നിലക്ക് ഞാന് പവര് ബട്ടണ് അല്പ നേരം അമര്ത്തി.
അതാ വരുന്നു....വെല്കം മെസേജ് !!!അന്ന് ഞാന് ഒരു കാര്യം കൂടി മനസ്സിലാക്കി - ഇവനെ ഒതുക്കാന്(ഓഫാക്കാന്)സ്ലൈഡിംഗ് പാനല് മയമില്ലാതെ ഒന്ന് ഉന്തിയാല് മതി,ബോധരഹിതനായിഅവന് നിലംപതിച്ചു കൊള്ളും!!!
സുപ്രഭാതങ്ങള് പിന്നെയും പൊട്ടി വിടര്ന്നു.ഒരു ദിവസം നോക്കിയയിലെ അലാറക്കഴുത അലറിക്കൊണ്ടിരിക്കുന്നു.നാലാമത്തെയോ അഞ്ചാമത്തെയോ അലാറം എന്റെ കാതില് സംഗീതമായി എത്തി.ഉടന് എണീറ്റ് ഞാന് ടച്ച് സ്ക്രീനിലെ 'സ്റ്റോപ്' തൊട്ടു.അവന് അലാറം നിര്ത്തിയില്ല! ഞാന് ഒന്നു കൂടി ശക്തിയില് 'സ്റ്റോപ്'അമര്ത്തി.അവന് അപ്പോഴും അലറല് തുടര്ന്നു.
'ങാ...ഹാ....നീ അത്രക്കായോ...?' എന്ന് ഞാന് മനസ്സില് കരുതിയതും അവന് സ്റ്റോപ്പായി!!(അന്ന് പിന്നെ അവന് അലറിയിട്ടില്ല).മനസ്സില് വിചാരിക്കുന്നതും ചെയ്യാന് കഴിയുന്ന NOKIA N95!!!പക്ഷേ അതെന്റെ വ്യാമോഹം മാത്രമായിരുന്നു.മറ്റു മെനുകള് എടുത്ത് പ്രവര്ത്തിപ്പിച്ച് നോക്കിയപ്പോളാണ് ഞാന് ആ ഞെട്ടിപ്പിക്കുന്ന സത്യം മനസ്സിലാക്കിയത്.എന്റെ നോക്കിയയുടെ ടച്ച് സ്ക്രീന് തലേന്ന് രാത്രി വീരചരമം പ്രാപിച്ചിരിക്കുന്നു.(അത് വരെയുള്ള സേവനത്തിന് ഞാന് അവന് ഒരു സഹന വീരചരമ ചക്രം സമ്മാനിച്ചു)
സൂര്യന് പതിവ് പോലെ പടിഞ്ഞാറ് ഉദിക്കുകയോ അസ്തമിക്കുകയോ ചെയ്തു(അത് പണ്ടേ എനിക്ക് കണ്ഫൂഷനാണ്).ഒരു ദിവസം ഫോണ് ഓണാക്കിയ എനിക്ക് വെല്കംസോംഗ് കേള്ക്കാന് കഴിഞ്ഞില്ല.ഞാന് സ്ലൈഡിംഗ് പാനല് നീക്കി.അപ്പോഴുണ്ടാകുന്ന മ്യൂസിക്കും കേള്ക്കുന്നില്ല.കൂട്ട പണിമുടക്ക് നടത്താന് ഇതെന്താ കേരള ഗവണ്മന്റ് ഉദ്യോഗസ്ഥരോ എന്ന് ചിന്തിച്ച് ദ്വേഷ്യത്തോടെ ഞാന് ഫോണ് ഓഫാക്കി.ഓഫാക്കുമ്പോഴുള്ള ദീനരോദനവും കേള്ക്കുന്നില്ല!!!അങ്ങിനെ എന്റെNOKIA N95 ഊമയുമായി.
(ഒരു പക്ഷേ തുടരും....)
Labels:
നോക്കിയ N95,
മൊബൈല്ഫോണ് പൊല്ലാപ്പുകള്
Sunday, June 01, 2008
നോക്കിയ N95-ഉം ഒരു പാവം മരമണ്ടനും !!! (ഭാഗം 2)
(ഒന്നാം ഭാഗം:http://abidiba.blogspot.com/2008/05/n95.html )
സെറ്റ് ചെയ്ത അലാറം കൃത്യമായി തന്നെ അടിയുമോ അതല്ല പറ്റിക്കുമോ എന്നറിയാന് ഞാന് രാത്രി 10.20-ന് അലാറം സെറ്റ് ചെയ്തു.അപ്പോള് സമയം 10.16.നാലും അഞ്ചും അല്ല പത്ത് മിനുട്ട് കഴിഞ്ഞിട്ടും എന്റെ നോക്കിയ എന്നെ നോക്കി ഇളിച്ചതല്ലാതെ ഒന്നും സംഭവിച്ചില്ല.ഞാന് വിട്ടില്ല.10.40-ന് വീണ്ടുംഅലാറം സെറ്റ് ചെയ്തു.അവനുണ്ടോ കുലുങ്ങുന്നു,ഞാനുണ്ടോ ഓര്ക്കുന്നു?
പിറ്റേ ദിവസം എനിക്ക് University Exam Invigilation Duty ഉണ്ടായിരുന്നു.പരീക്ഷാഹാളില് എത്തി ഞാന് ഉറക്കെ പറഞ്ഞു.
"All of you switch of your mobilephone and keep it in my seat".
എല്ലാവരും അവനവന്റെ കുന്ത്രാണ്ടങ്ങള് പൊക്കി എടുത്ത് എന്റെ അടുത്ത് കൊണ്ടു വച്ചു.എന്റെ കയ്യിലെ കുന്ത്രാണ്ടം പോലെ ഒരെണ്ണം ആരുടെയും കയ്യില് കണ്ടില്ല.
ഇന്വിജിലേറ്റര് ആയ ഞാന് എന്റെ ഫോണും ഓഫാക്കണമായിരുന്നു.അതിനായി പഠിച്ച പണി 18-ഉം പയറ്റിയിട്ടും സാധിച്ചില്ല.തലേ ദിവസം തുടര്ച്ചയായി ഓഫായി കൊണ്ടിരുന്നതായിരുന്നു ഫോണിന്റെ പ്രശ്നം.ഇന്ന് ഓഫാക്കാന് ഒരു വിധത്തിലും സാധിക്കുന്നില്ല!!
ഞാന് മെല്ലെ Exam Hall-ന്റെ വാതില്ക്കലേക്ക് നീങ്ങി.ആരെയെങ്കിലും ഫോണ് ഏല്പിച്ചാലോ എന്ന് ചിന്തിച്ചു.അപ്പോള് അതുവഴി എന്റെ ഡിപ്പാര്ട്ട്മെന്റിലെ തന്നെ ലക്ചറര് ആയ ശബീര് സര് വന്നു.
ഫോണിന്മേല് കളിയില് അഗ്രഗണ്യനായ അദ്ദേഹത്തിന് ഫോണ് കൈമാറി അതൊന്ന് ഓഫ് ചെയ്തു തരാന് ഞാന് ആവശ്യപ്പെട്ടു.പത്ത് മിനുട്ട് നേരത്തെ പരിശ്രമത്തിന് ശേഷം എങ്ങനെയോ (അതെ!!!എങ്ങനെ എന്ന് അദ്ദേഹത്തിനും അറിയില്ല!!!) സാധനം ഓഫായി.സമാധാനത്തോടെ ഫോണ് കീശയിലിട്ട് ഞാന് പരീക്ഷാ ഹാളില് കയറി.
സമയം ഇഴഞ്ഞു നീങ്ങി.ഞാന് കുട്ടികളുടെ പിന്നില് ഇരുന്ന് പരീക്ഷ വീക്ഷിച്ചുകൊണ്ടിരിക്കുകയാണ്.പെട്ടെന്ന് ഒരു മൊബൈല് റിങ്ങ്ടോണ് ശബ്ദം!
'ങേ......ഹാ...ഞാനിങ്ങനെയൊക്കെ പറഞ്ഞിട്ടും Exam Hall-ല് മൊബൈല്ഫോണ് ഉപയോഗിക്കാന് മാത്രം ധൈര്യമുള്ള ഭിന്ദ്രന്വാല ആര്' എന്ന മട്ടില് ഞാന് ചാടി എണീറ്റു.
അപ്പോഴാണ് എന്റെ പാന്റിന്റെ കീശ വൈബ്രേറ്റ് ചെയ്യുന്നതായി ഞാന് മനസ്സിലാക്കിയത്!ഫോണെടുത്ത് നോക്കിയ ഞാന് ഞെട്ടിപ്പോയി.തലേ ദിവസം രാത്രി 10.40-ന് അടിക്കാന് ഏല്പിച്ച അലാറക്കഴുത രാവിലെ 10.40-ന് എണീറ്റ് അലമുറയിടുന്നു..സെറ്റ് ഓഫായതിനാല് എവിടെ പിടിച്ച് നെക്കിയാലാണ് ഈ അലറല് നില്ക്കാ എന്നറിയാതെ ഞാന് പുറത്തെക്കോടി.പുറത്തെത്തുമ്പോഴേക്കും അവന് അലറല് നിര്ത്തി.സമാധാനത്തിന്റെ നെടുവീര്പ്പിട്ട് ഞാന് വീണ്ടും ഹാളില് പ്രവേശിച്ചു.
സമയം വീണ്ടും നീങ്ങി.ഒരു കുട്ടി അഡീഷണല് ഷീറ്റ് ആവശ്യപ്പെട്ടു കൊണ്ട് എണീറ്റ് നിന്നു.ഞാന് പേപ്പറുമായി അങ്ങോട്ട് നീങ്ങവേ എന്റെ കീശ വീണ്ടും വൈബ്രേറ്റ് ചെയ്യാന് തുടങ്ങി!!!എന്ത് ചെയ്യണമെന്നറിയാതെ ഞാന് നിന്ന് പരുങ്ങുമ്പോള് കുട്ടികളുടെ മുഖത്ത് ചിരി പടരുന്നത് നിസ്സഹായനായി ഞാന് നോക്കി നിന്നു.
അമളി പരമ്പരക്കൊടുവില് , ഒരാഴ്ച പിന്നിട്ടപ്പോളാണ് ഫോണ് കൊടുത്തവിട്ട ആളുടെ വിളി വന്നത്.സുഖ വിവരങ്ങള് അറിയാനല്ല,ഫോണിനെ കണ്ട്രോള് ചെയ്യാന് ആനക്ക് തോട്ടി എന്ന പോലെ ഒരു കുത്താംകോല് (കുത്തുന്ന വടി) കൂടി അതില് തിരികി വച്ചിട്ടുണ്ട് എന്ന് പറയാന്.അതെടുത്ത് പ്രയോഗിച്ചാല് ഫോണ് മെരുങ്ങുമത്രേ!!!
ആണി പോലുള്ള ആ കോലും കോലുപോലുള്ള ഈ ഞാനും മെരുക്കിയിട്ടും മെരുങ്ങാതെ എന്റെ നോക്കിയ N95 ഇപ്പോഴും എന്നെ നോക്കി ഇളിക്കുന്നു.
Labels:
നോക്കിയ N95,
മൊബൈല്ഫോണ് പൊല്ലാപ്പുകള്
Saturday, May 31, 2008
നോക്കിയ N95-ഉം ഒരു പാവം മരമണ്ടനും !!!
അപ്രതീക്ഷിതമായി സൗജന്യമായി എനിക്ക് ഒരു NOKIA N95 മൊബൈല് ഫോണ് ലഭിച്ചു.കൂടുതല് സൗകര്യങ്ങളുള്ള ഫോണ് കാണുമ്പോള് മറ്റുള്ളവര് കൗതുകത്തോടെ അവയുടെ വിശദാംശങ്ങള് ചോദിച്ച് അറിയുമ്പോള് ഞാന് അവ ഗൗനിക്കാറില്ലായിരുന്നു.കാരണം മൊബൈല് ഫോണ് ഫോണിന്റെ ഉപയോഗത്തിന് എന്ന പോളിസിക്കാരനായിരുന്നു ഞാന്.
അതിനാല് തന്നെ ഈ കുന്ത്രാണ്ടം കയ്യില് കിട്ടിയപ്പോള് അതെങ്ങിനെ ഓപെറേറ്റ് ചെയ്യണം എന്ന് എനിക്ക് ഒരു എത്തും പിടിയും കിട്ടിയില്ല.കാറ്റലോഗോ ഓപറേറ്റിംഗ് മാന്വലോ ഇല്ലാത്തതിനാല് കുറുക്കന് ആമയെ കിട്ടിയ പോലെ ഒരാഴ്ച ഞാന് അത് അലമാരയിലിട്ട് പൂട്ടി.
ഒരാഴ്ച കഴിഞ്ഞ് ഞാന് ഫോണ് എടുത്തു.നിറയെ ബട്ടണുകളുള്ള ഫോണിന്റെ ബട്ടണുകളെല്ലാം ഒന്നൊന്നായി അമര്ത്തിയിട്ടും അത് ഓണായില്ല(പവര് ബട്ടണ് അതുവരെ ഞാന് കണ്ടിരുന്നില്ല).
ചാര്ജ്ജ് ചെയ്യാത്തതിനാലാണോ സാധനം ഓണാകാത്തത് എന്ന സംശയം ബലപ്പെട്ടതിനാല് അടുത്ത ദിവസം ഫോണുമായി ഞാന് നാട്ടിലെ ഒരു കടയില് നിന്നും ചാര്ജര് വാങ്ങി.(അതിന് മുമ്പ് എന്റെ പഴയ ഫോണിന്റെ ചാര്ജര് എടുത്ത് അത് ചാര്ജ് ചെയ്യാന് നോക്കിയിരുന്നു.ചാര്ജര് കുത്തിയത് ഇയര്ഫോണ് ഔട്ട്ലെറ്റില് ആയിരുന്നു എന്ന് പിന്നീട് മനസ്സിലായി).ഓപറേറ്റ് ചെയ്യുന്ന വിധം അന്വേഷിച്ചപ്പോള് അവനും കൈ മലര്ത്തി.
ഏതായാലും വീട്ടില് തിരിച്ചെത്തി ഞാന് ഫോണ് ചാര്ജ് ചെയ്യാനിട്ടു.ഒരു മണിക്കൂര് കഴിഞ്ഞ് ആദ്യമായി ഞാന് ഫോണിന്റെ പവര് ബട്ടണ് കണ്ടെത്തി (!) പ്രസ് ചെയ്തു.എന്തൊക്കെയോ ശബ്ദങ്ങള് പുറപ്പെടുവിച്ചുകൊണ്ട് നല്ലൊരു കളര് ഡിസ്പ്ലേയില് ഫോണ് ഓണായി.സന്തോഷം കൊണ്ട് എന്റെ മനം കുളിര്ക്കാന് തുടങ്ങുമ്പോഴേക്കും ഡിസ്പ്ലേ ഓഫായി ബ്ലാങ്ക് സ്ക്രീന് മാത്രമായി.!!!
ന്യൂമറിക് കീ അല്ലാത്ത എല്ലാ ബട്ടണുകളും ഞാന് വീണ്ടും അമര്ത്താന് തുടങ്ങി.പെട്ടെന്ന് വലിയയൊരു ശബ്ദത്തില് "വന്ദേമാതരം" പാടാന് തുടങ്ങി.ശബ്ദം കുറക്കാന് എന്ത് ചെയ്യണമെന്നറിയാതെ വീണ്ടും സകലമാന ബട്ടണുകളും അമര്ത്തിയതിനാല് അയല്ക്കാര് ഓടി വന്നില്ല.
ഇനി ഇക്കളി തീക്കളി ആണെന്ന് മനസ്സിലായതിനാല് ഞാന് ഇന്റര്നെറ്റില് പരതി കാറ്റലോഗ് സംഘടിപ്പിച്ചു.കാറ്റലോഗില് പറയുന്ന പ്രകാരമുള്ള ഇന്നര്മെനുകളിലേക്ക് പോകാന് ഏത് ബട്ടണ് അമര്ത്തണം എന്ന ധര്മ്മസങ്കടം വീണ്ടും എന്നെ പിടികൂടി.
അങ്ങനെ ഇരിക്കെ ഒരു ദിവസം എന്റെ നോക്കിയയുടെ സ്ക്രീനില് എന്റെ കൈ അറിയാതെ തട്ടിപ്പോയി! പെട്ടെന്ന് അതില് ഡിസ്പ്ലേ ലൈറ്റ് വന്നു!!അതണഞ്ഞപ്പോള് ഞാന് ഒന്നുകൂടി കൈകൊണ്ട് തൊട്ട് നോക്കി.വീണ്ടും ഡിസ്പ്ലേ ലൈറ്റ്!!
"യുറീക്ക....യുറീക്കാ...." എന്ന് വിളിച്ചുകൊണ്ട് തുണിയുരിഞ്ഞോടാന് പറ്റാത്ത അവസ്ഥയായതിനാല് ഞാനത് ചെയ്തില്ല.പിന്നെ കാണുന്ന ഓപ്ഷനുകളിലെല്ലാം കൈപ്രയോഗം നടത്തി ഞാന് നോക്കിയയെ മെരുക്കി എടുക്കാന് ശ്രമിച്ചു.അങ്ങനെ അലാറം സെറ്റ് ചെയ്യുന്നത് എങ്ങനെ എന്ന എന്റെ പരീക്ഷണം പിറ്റേന്ന് ഒരമളി കൂടി ക്ഷണിച്ചുവരുത്തി.
അത് നാളെ പറയാം.....
Labels:
നോക്കിയ N95,
മൊബൈല്ഫോണ് പൊല്ലാപ്പുകള്
