മുംബൈയിലെ പ്രധാന കാഴ്ചകളിൽ പലരും എണ്ണിപ്പറയുന്ന ഒന്നാണ് ഹാജി അലി ദർഗ. എനിക്കാണെങ്കിൽ പോകാനും കാണാനും ഒട്ടും ഇഷ്‌ടമില്ലാത്ത ഇടമാണ് ദർഗ്ഗകൾ. അന്ധവിശ്വാസങ്ങളുടെയും ചൂഷണങ്ങളുടെയും ഈറ്റില്ലങ്ങളായത് കൊണ്ടും ആദ്യമായി ഹസ്രത്ത് നിസാമുദ്ദീൻ ദർഗയിൽ പോയ അനുഭവം കൊണ്ടും ആയിരിക്കാം ഈ അനിഷ്‌ടം. ബട്ട്, കടലിലാണ് ഹാജി അലി ദർഗ എന്നും വേലിയിറക്കത്തിൻ്റെ സമയത്ത് അങ്ങോട്ട് നടന്ന് പോകാമെന്നും കേട്ടപ്പോൾ അതൊന്ന് കാണണമെന്ന് മനസ്സിൽ ആഗ്രഹമുദിച്ചു. കടൽ തുരങ്കം കടന്ന് കഴിഞ്ഞാൽ ഉടൻ തന്നെയാണ് ഹാജി അലി ദർഗ എന്ന് ഡ്രൈവർ മുരുകവേൽ പറഞ്ഞപ്പോൾ മനസ്സിൽ ഒരു ലഡു പൊട്ടി.
പന്ത്രണ്ട് മണിയോടെ ഞങ്ങളെ ഹാജി അലി ദർഗയുടെ സമീപത്തെ റോഡിൽ ഇറക്കി. അണ്ടർ പാസ് വഴി റോഡ് ക്രോസ് ചെയ്ത് മറുഭാഗത്ത് എത്തി അല്പം മുന്നോട്ട് നടന്നാൽ ദർഗയിൽ എത്താം എന്ന് മുരുകവേൽ പറഞ്ഞുവെങ്കിലും എനിക്കത് കൃത്യമായി മനസ്സിലാക്കാൻ കഴിഞ്ഞില്ല. മുന്നിൽ പോകുന്ന ഒരു കൂട്ടത്തെ പിന്തുടർന്ന് ഞങ്ങളും ദർഗ്ഗയിലേക്ക് നടന്നു. കേട്ടത് പോലെ കടലിനുള്ളിലേക്ക് അൽപം തള്ളി നിൽക്കുന്ന ദർഗ്ഗയിലേക്കുള്ള പാതയുടെ ഇരുവശവും തിരകൾ തല തല്ലുന്നുണ്ടായിരുന്നു. ചില തിരകൾ പാതയുടെ ഉയരവും കടന്ന് സന്ദർശകരുടെ പാദങ്ങളെ തഴുകി ഒഴുകി.
ഉസ്ബകിസ്ഥാനിലെ ബുഖാറയിൽ നിന്നുള്ള പീർ ഹാജി അലി ഷായുടെ ശവകുടീരവും പള്ളിയുമാണ് ഹാജി അലി ദർഗയിലുള്ളത്. ധനികനായ വ്യാപാരിയും സൂഫി വര്യനുമായ ഹാജി അലി സ്വത്ത് മുഴുവൻ ഉപേക്ഷിച്ച് ലോക സഞ്ചാരം നടത്തി അവസാനം മുംബൈ വർളിയിൽ താമസമാക്കി എന്നും ഇസ്‌ലാം മതപ്രചാരണത്തിൽ ഏർപ്പെട്ടു എന്നും പറയപ്പെടുന്നു. തൻ്റെ മരണ ശേഷം തന്നെ ഖബറടക്കരുത് എന്നും മൃതശരീരം കടലിൽ ഒഴുക്കി അത് എത്തിച്ചേരുന്നിടത്ത് ഖബറടക്കണം എന്നും അദ്ദേഹം അനുയായികളോട് പറഞ്ഞു എന്നും അത് പ്രകാരമാണ് ഇന്ന് ദർഗ്ഗ കാണുന്ന സ്ഥലത്ത് ഖബറടക്കിയത് എന്നും പറയപ്പെടുന്നു.
ജാതി മത ലിംഗ ഭേദമന്യേ ആർക്കും ദർഗ്ഗയിൽ പ്രവേശിക്കാം. ചുവപ്പും മഞ്ഞയും നിറത്തിലുള്ള നിരവധി ചരടുകൾ ദർഗ്ഗക്ക് ചുറ്റുമുള്ള കൈവരികളിൽ കെട്ടിയിട്ടതായി കണ്ടു. ആഗ്രഹ പൂർത്തീകരണത്തിനായി വന്നവർ പ്രാർത്ഥന നടത്തി ചരട് കെട്ടിയിട്ട് പോകുന്നതാണ്. ആഗ്രഹം പൂർത്തീകരിക്കപ്പെട്ടാൽ താൻ കെട്ടിയ ചരട് അഴിക്കണം. ഈ കൂട്ടത്തിൽ നിന്ന് തൻ്റെ ചരട് എങ്ങനെയാണാവോ തിരിച്ചറിയുക എന്നായിരുന്നു എൻ്റെ ചിന്ത. ളുഹർ നമസ്‌കാര സമയമായതിനാൽ അത് നിർവ്വഹിക്കാൻ സൗകര്യം കിട്ടി എന്നതാണ് ദർഗ സന്ദർശിച്ചത് കൊണ്ട് എനിക്ക് ലഭിച്ച ഗുണം.
ദർഗ കണ്ട ശേഷം വർളിയിൽ നിന്ന് സീ ലിങ്ക് പാലം വഴി ഞങ്ങൾ ബാന്ദ്രയിലേക്ക് തന്നെ മടങ്ങി. മുംബൈയിൽ എത്തുന്ന സഞ്ചാരികളെ ടാക്സിക്കാർ മൂന്ന് വീടുകൾ കാണിക്കാറുണ്ട്. അതിൽ ഒന്നാമത്തേത് അംബാനിയുടെ വീടാണ്. ഒരു ഫ്ലാറ്റ് കണക്കെ ദൂരെ ഉയർന്ന് നിൽക്കുന്ന ഒരു കെട്ടിടം അംബാനിയുടെ വീടാണെന്ന് അവർ പറയുന്നത് വിശ്വസിക്കാനേ നമുക്ക് സാധിക്കൂ.
രണ്ടാമത്തെ വീട് ബോളിവുഡ് നടൻ സൽമാൻ ഖാൻ്റെ വീടാണ്. വണ്ടി നിർത്തുക പോലും ചെയ്യാതെ ഡ്രൈവർ മുരുകവേൽ ആ വീട് പാസ് ചെയ്തപ്പോൾ അതിൻ്റെ പ്രാധാന്യത്തിൻ്റെ നിലവാരം മനസ്സിലായി.മുരുകവേലിൻ്റെ ബോണസായി നടി രേഖയുടെ വീട് കൂടി ഞങ്ങൾക്ക് കാണിച്ച് തന്നു. അതാരാണെന്ന് എനിക്ക് ഒരു നിശ്ചയവുമില്ലാത്തതിനാൽ ഞാനൊന്ന് മൂളുക മാത്രം ചെയ്തു. ഫൈനലി, ഞങ്ങൾ ഹിന്ദി സിനിമയിലെ മെഗാ സ്റ്റാറും എക്കാലത്തും യുവതീ യുവാക്കളുടെ ആവേശവുമായ ഷാരൂഖ് ഖാൻ്റെ വീടായ "മന്നത്ത്" ൻ്റെ മുന്നിലെത്തി വണ്ടി പാർക്ക് ചെയ്തു.
"മന്നത്തി"ന് മുമ്പിൽ ഞങ്ങൾ എത്തുമ്പോൾ ചെറിയ ഒരാൾക്കൂട്ടം അവിടെ കൂടി നിൽക്കുന്നുണ്ടായിരുന്നു.ഷാറൂഖ് ഖാൻ്റെ വീട് എന്നതല്ലാതെ ഒരു അസാധാരണ കാഴ്ചയായി എനിക്കത് അനുഭവപ്പെട്ടില്ല; സാധാരണ പോലെയുള്ള ഒരു ഗേറ്റും ഉയരം കൂടിയ ചുറ്റുമതിലും. ചുറ്റുമതിലിന് മുകളിൽ വീണ്ടും ഒരാൾ പൊക്കത്തിൽ കമ്പിവേലിയും സ്ഥാപിച്ചിരുന്നു. ഗേറ്റിന് സമീപം അല്പം ഉയർത്തി നിർമ്മിച്ച ബാൽക്കണി പോലെയുള്ള ചെറിയ ഒരിടം കാണാം. പെരുന്നാളിനും തൻ്റെ പിറന്നാളിനും ഷാറൂഖ് ഖാൻ ഇവിടെ വന്ന് ജനങ്ങളെ അഭിവാദ്യം ചെയ്യാറുണ്ട്. മറ്റ് ദിവസങ്ങളിൽ ഇങ്ങനെ ചെയ്യാറുണ്ടോ എന്നറിയില്ല. ജനം അദ്ദേഹത്തെയും പ്രതീക്ഷിച്ച് അവിടെ കാത്തിരിക്കുന്നത് കണ്ടപ്പോൾ, കാഴ്ചബംഗ്ലാവിൽ ചില മൃഗങ്ങൾ കൂട്ടിൽ നിന്നും പുറത്തിറങ്ങാൻ വേണ്ടി കാത്ത് നിൽക്കുന്നതാണ് പെട്ടെന്ന് ഓർമ്മ വന്നത്.
"മന്നത്തി"ൻ്റെ മുൻ ഭാഗത്തെ റോഡിനപ്പുറം അറബിക്കടലാണ്. അൽപനേരം കാറ്റുകൊള്ളാനായി ഞങ്ങൾ കടലിലേക്കിറങ്ങി. പക്ഷേ, എവിടെ നിന്നോ ഓടിയെത്തിയ പോലീസ് എല്ലാവരെയും ആട്ടിത്തെളിച്ച് എങ്ങോട്ടോ പോയി. പിന്നാലെ വന്ന സഞ്ചാരികൾ വീണ്ടും കടലിലേക്ക് ഇറങ്ങി. ചെങ്കല്ല് പോലെയുള്ള പാറ നിറഞ്ഞ പ്രദേശമായതിനാൽ അപായ സാദ്ധ്യത ഉള്ളത് കൊണ്ടാകാം ഈ പോലീസ് നിയന്ത്രണം. താമസിയാതെ ഞങ്ങളും തിരിച്ച് വണ്ടിയിൽ കയറി.
ഈ ടീമിൻ്റെ കഴിഞ്ഞ കാശ്മീർ യാത്രയിൽ ഷോപ്പിംഗിന് അവസരം കുറവായിരുന്നു എന്ന പരാതി ഉണ്ടായിരുന്നതിനാൽ ഇത്തവണ എല്ലാ ദിവസവും ഷോപ്പിംഗിന് സമയം നിശ്ചയിച്ചിരുന്നു. അത് പ്രകാരം മുംബൈയിൽ ഷോപ്പിംഗിന് തീരുമാനിച്ചത് മൂന്ന് കിലോമീറ്ററിലധികം നീളത്തിൽ കിടക്കുന്ന ഓപ്പൺ മാർക്കറ്റ് ആയ ഫാഷൻ സ്ട്രീറ്റ് ആയിരുന്നു.ടാക്സി ഡ്രൈവർ മുരുകവേൽ ഞങ്ങളെ ഫാഷൻ സ്ട്രീറ്റിൽ എത്തിച്ചു.
മുതിർന്നവരുടെ വിവിധ തരം ഡ്രസ് ഐറ്റങ്ങളും പാദരക്ഷകളും ബാഗുകളും ആണ് ഫാഷൻ മാർക്കറ്റിൽ പ്രധാനമായും ഉള്ളത്. ഒന്നര മണിക്കൂറോളം ഷോപ്പിംഗ് നടത്തിയ ശേഷം മുരുകവേൽ ഞങ്ങളെ ഛത്രപതി ശിവജി ടെർമിനസിനടുത്ത് ഡ്രോപ് ചെയ്യാനായി തിരിച്ചു. അപ്പോഴാണ് ജുഹു ബീച്ച് കാണണമെന്ന ആഗ്രഹം ഫൈസൽ പ്രകടിപ്പിച്ചത്. ജുഹു ബീച്ച് കാണാൻ അന്ധേരിയിൽ പോകണമെന്നും മെട്രോ ട്രെയിനിൽ പോകുന്നതാണ് നല്ലത് എന്നും മുരുകവേൽ പറഞ്ഞു. അതനുസരിച്ച് ഞങ്ങൾ സി എസ് ടി മെട്രോ സ്റ്റേഷന് സമീപം വണ്ടിയിറങ്ങി.
(തുടരും...)
