ഇന്ന് മുംബൈ മഹാനഗരക്കാഴ്ചകളിലേക്ക് ഇറങ്ങുകയാണ്. ആദ്യമായി ഒരു മഹാ നഗരം കാണാനിറങ്ങുന്ന ഒരു കുട്ടിയുടെ സ്വപ്നങ്ങളായിരുന്നു എൻ്റെ മനസ്സ് നിറയെ.പ്ലാൻ ചെയ്തതെല്ലാം കാണണമെങ്കിൽ നേരത്തെ എണീറ്റ് പുറപ്പെടണം എന്ന് ഞാൻ എല്ലാവരെയും ഉണർത്തിയിരുന്നു.ബട്ട്, കാണാൻ പറ്റുന്നത്ര കണ്ടാൽ മതി എന്നായിരുന്നു എല്ലാവരുടെയും മനസ്സിൽ എന്ന് പുറപ്പെട്ട സമയം വ്യക്തമാക്കി.
തലേ ദിവസം ഗഫൂർക്ക പറഞ്ഞ പോലെ റൂം വെക്കേറ്റ് ചെയ്ത് ലഗേജുകൾ മുഴുവൻ, കയറ്റ് കൂലിയടക്കം 350 രൂപ കൊടുത്ത് സൊസൈറ്റി ഹോട്ടലിൻ്റെ ഡോർമട്രിയിൽ കൊണ്ട് വെച്ചു.
"ഇന്ന് നടക്കാൻ ഞാനില്ല ട്ടോ.." നുസൈബ ആദ്യം തന്നെ നയം വ്യക്തമാക്കി.
"ഞാനും..." നിശീധിനിയും പിന്താങ്ങി.
"ഇന്ന് ബസ് ടാക്സി ഓട്ടോ ട്രെയിൻ മാത്രം , നോ നടത്തം..." ഞാനും വെറുതെയങ്ങ് കാച്ചി.
ഛത്രപതി ശിവജി ടെർമിനസിന് മുമ്പിലുള്ള ബസ് സ്റ്റോപ്പിൽ ഞങ്ങൾ ബസ് കാത്ത് നിന്നു. എല്ലാ ബസ്സുകളും ഗേറ്റ് വേ ഓഫ് ഇന്ത്യയിൽ പോകും എന്ന് ബസ് കാത്ത് നിന്ന ഒരു ചെറുപ്പക്കാരൻ പറഞ്ഞു. അത് കേട്ടപ്പോൾ സമാധാനം തോന്നിയെങ്കിലും അല്പം കഴിഞ്ഞപ്പോൾ അത് ഇല്ലാതായി. കാരണം എല്ലാ ബസ്സുകളും ഈ സ്റ്റോപ്പിൽ നിർത്തില്ല എന്ന് ഞങ്ങൾക്ക് മനസ്സിലായി.
അവസാനം ഒരു ചുവപ്പ് ബസ് നിർത്തിയതും ആരൊക്കെയോ ഞങ്ങളെ തള്ളി അകത്താക്കിയതും ഒരുമിച്ചായിരുന്നു. മുംബൈയിൽ ബസ്സിലും ട്രെയിനിലും ഒന്നും നമ്മൾ കയറണ്ട , ആരെങ്കിലും ഉന്തിക്കയറ്റിക്കൊള്ളും ! പന്ത്രണ്ട് രൂപക്ക് CST യിൽ നിന്ന് ഞങ്ങൾ ഗേറ്റ് വേ ഓഫ് ഇന്ത്യയുടെ തൊട്ടടുത്തുള്ള സ്റ്റോപ്പിൽ എത്തി.അപ്പോഴേക്കും ആ പരിസരം വീണ്ടും ജനനിബിഡമായിരുന്നു.
ബ്രിട്ടീഷ് രാജാവായിരുന്ന ജോർജ്ജ് അഞ്ചാമനും രാജ്ഞി മേരിയും 1911 ൽ മുംബൈ സന്ദർശിച്ചതിൻ്റെ സ്മാരകമായാണ് ഗേറ്റ് വേ ഓഫ് ഇന്ത്യ നിർമ്മിച്ചത്. ഇന്ത്യ സന്ദർശിച്ച ആദ്യത്തെ ബ്രിട്ടീഷ് രാജാവായിരുന്നു ജോർജ്ജ് അഞ്ചാമൻ. 1948 ൽ അവസാനത്തെ ബ്രിട്ടീഷ് സൈന്യം ഇന്ത്യ വിട്ടുപോയതും ഈ ഗേറ്റ് വേയിലൂടെ ആയിരുന്നു എന്ന് ചരിത്രം പറയുന്നു.
എലഫൻ്റാ ഗുഹകളിലേക്കുള്ള ബോട്ട് സർവീസ് ഗേറ്റ് വേ ഓഫ് ഇന്ത്യയിൽ നിന്നാണ് ആരംഭിക്കുന്നത്. 260 രൂപയാണ് റിട്ടേൺ ടിക്കറ്റ് അടക്കമുള്ള ഫെറി ചാർജ്ജ്. എലഫൻ്റ ദ്വീപ് വരെ പോയി ഗുഹ കണ്ട് തിരിച്ചുവരാൻ ഒരു ദിവസം തന്നെ വേണം എന്നതിനാൽ ഞങ്ങൾ ആ യാത്രക്ക് മുതിർന്നില്ല.ഗേറ്റ് വേ ഓഫ് ഇന്ത്യ രാത്രിയും താജ് ഹോട്ടൽ പകലുമാണ് കാണാൻ മനോഹരമായി എനിക്ക് തോന്നിയത്. ഗേറ്റ് വേ ഓഫ് ഇന്ത്യയുടെ മുന്നിൽ നിന്നും താജ് ഹോട്ടലിനെ ബാക്ക് ഗ്രൗണ്ടാക്കിയും ഞങ്ങൾ ധാരാളം ഫോട്ടോകളും വീഡിയോകളും പകർത്തി.
ടാറ്റാ ഗ്രൂപ്പിൻ്റെ കീഴിലുള്ള ഇന്ത്യയിലെ ഏറ്റവും പ്രശസ്തമായ ഹോട്ടലാണ് ഗേറ്റ് വേ ഓഫ് ഇന്ത്യക്ക് സമീപമുള്ള താജ് മഹൽ പാലസ് ഹോട്ടൽ.1903 ലാണ് ഇത് ഉദ്ഘാടനം ചെയ്യപ്പെട്ടത്. ഹോട്ടലിൻ്റെ ഉത്ഭവത്തിന് പിന്നിൽ രണ്ട് കഥകൾ ഉണ്ട്. വെള്ളക്കാർക്ക് മാത്രമായുള്ള ഹോട്ടലിന് പകരമായി ആരംഭിച്ചതാണെന്നും അതല്ല മുംബൈയുടെ പ്രൗഢിക്കും പ്രശസ്തിക്കും അനുയോജ്യമായ ഒരു ഹോട്ടൽ വേണമെന്ന് ജംഷഡ്ജി ടാറ്റക്ക് തോന്നിയത് കൊണ്ട് അദ്ദേഹം നിർമ്മിച്ചതാണെന്നും പറയപ്പെടുന്നു. 2008 ലെ മുബൈ ഭീകരാക്രമണത്തിൽ താജ് ഹോട്ടലിനും സാരമായ കേടുപാടുകൾ സംഭവിച്ചിരുന്നു.
വെയില് ചൂടാവാൻ തുടങ്ങി. മുംബൈയിൽ കാഴ്ചകളിലേക്ക് ഇറങ്ങിയതേയുള്ളൂ.ബാക്കി സ്ഥലങ്ങളിലേക്ക് ഓട്ടോയിലും ബസ്സിലും പോകുന്നത് സമയം കളയുമെന്നതിനാൽ വൈകിട്ട് വരെയുള്ള സമയത്തിനുള്ളിൽ കാണേണ്ടവയുടെ മുൻഗണനാ ക്രമം പാലിക്കാൻ ടാക്സി വിളിക്കാൻ തീരുമാനിച്ചു. അങ്ങനെ 2700 രൂപക്ക് വൈകിട്ട് അഞ്ച് മണിക്ക് ഡ്രോപ് ചെയ്യുന്ന വിധത്തിൽ ടാക്സി സെറ്റാക്കി ഞങ്ങൾ യാത്ര തുടർന്നു.
(തുടരും...)
