Pages

Saturday, December 10, 2016

വീണ്ടും ആദ്യരാത്രി!!

             (നിയമപ്രകാരമുള്ള മുന്നറിയിപ്പ് : 18 വയസ്സ് കഴിഞ്ഞവര്‍ക്കും അല്ലാത്തവര്‍ക്കും വായിക്കാം)
             രാജ്യം മുഴുവന്‍ ഏക സിവില്‍കോഡും കള്ളപ്പണവും അതിര്‍ത്തിയിലെ ജവാന്മാരും ചൂട് പിടിച്ച ചര്‍ച്ചാ വിഷയമാകുമ്പോള്‍, കേരളം എന്ന കൊച്ചു സംസ്ഥാനത്തില്‍ അല്പമെങ്കിലും മനസമാധാനത്തോടെ  ഞാന്‍ എന്റെ രണ്ടാം ആദ്യരാത്രി ആഘോഷിച്ചു! എല്ലാ മാന്യ വായനക്കാരോടും ബൂലോകരോടും മുന്‍‌കൂട്ടി അറിയിക്കാതെ ഈ പണി പറ്റിച്ചതില്‍ ഞാന്‍ 100 ഏത്തം ഓണ്‍ലൈനില്‍ ഇടുന്നു.2000ന്റെ നോട്ട് വിശറിയായി മാത്രം ഉപയോഗിക്കാന്‍ പറ്റുന്ന ഇക്കാലത്ത് ഇനി എല്ലാവരെയും വിളിച്ച് ഒരു സദ്യ ഒക്കെ തര്വാ എന്ന് പറയുന്നത് മോദിജി പ്രത്യേകം നിരീക്ഷിക്കും എന്നതിനാല്‍ അത് ആരും പ്രതീക്ഷിക്കേണ്ട. പകരം ഇതാ ആ രാത്രിയുടെ ലൈവ് വിവരണം!!

             ഭാര്യയോടും കുട്ടികളോടും പറഞ്ഞ് തന്നെയാണ് ഞാന്‍ ഈ പണിക്ക് ഇറങ്ങിയത്. അല്പ-സ്വല്പം അസ്വാരസ്യങ്ങള്‍ ഉണ്ടായെങ്കിലും ദൈവം സഹായിച്ചാല്‍ രണ്ട് ദിവസത്തിനകം തിരിച്ചെത്തും എന്ന് കുടുംബത്തിന് ഞാന്‍ ഉറപ്പ് നല്‍കി. നാട്ടില്‍ കൂടുതല്‍ ബഹളം ഉണ്ടാക്കേണ്ട എന്ന് കരുതി തിരുവനന്തപുരത്തായിരുന്നു ചടങ്ങ്.

            രാത്രി 10 മണിയായതോടെ ഞാന്‍ മന്ദം മന്ദം എന്റെ റൂമിലേക്ക് നീങ്ങി.ഏതോ ഒരു പപ്പരാസി  ഒരു ഫോണുമായി അവിടെ ചുറ്റിപ്പറ്റി നില്‍ക്കുന്നുണ്ടായിരുന്നു! അവന്‍ ഫോണില്‍ എന്തൊക്കെയോ നോക്കുകയാണെന്ന്  എന്നെ ധരിപ്പിക്കുന്നുണ്ടായിരുന്നു.പക്ഷെ ഞാന്‍ ആരാ മോന്‍ എന്ന് അവന്‍ മനസ്സിലാക്കാത്തതിനാല്‍ അര മണിക്കൂറോളം കാത്ത് നിന്ന്  ക്ഷമ നശിച്ച് അവന്‍ പോയി !!

          ദൂരെ നിന്നും കുറുക്കന്മാര്‍ ഓലിയിടുന്ന ശബ്ദം പോലെ എന്തോ ഇടക്കിടെ ഉയര്‍ന്നു കേള്‍ക്കുന്നുണ്ടായിരുന്നു.അവ അടുത്തടുത്ത് വന്ന് അകന്നകന്ന് പോയി.ഈ തലസ്ഥാന നഗരത്തിന്റെ ഹൃദയഭാഗത്തും ഇത്രയധികം കുറുക്കന്മാര്‍ (തെരുവ് നായകള്‍ അല്ല എന്ന് ശബ്ദം കേട്ട ഞാന്‍ ഉറപ്പിച്ച് പറയുന്നു) എവിടെ വസിക്കുന്നു എന്ന് എനിക്ക് മനസ്സിലായില്ല. രാഷ്ട്രീയ കുറുക്കന്മാരെ പകല്‍ സമയത്ത് നിരവധി കാണാറുണ്ട്. പക്ഷെ രാത്രി സമയത്ത് അവര്‍ ഓലിയിടാറില്ല.പിന്നെ ?? അതേ പറ്റി അധികം ചിന്തിക്കാതെ ഞാന്‍ മെല്ലെ റൂമിലേക്ക് കയറി.

           എനിക്ക് വേണ്ടത്ര പരിചയമില്ലാത്ത സ്ഥലമായതിനാല്‍ വാതിലിന്റെ കുറ്റിയും കൊളുത്തും എല്ലാം ഭദ്രമാണെന്ന് ഞാന്‍ ആദ്യം തന്നെ ഉറപ്പ് വരുത്തി.വാതിലിന്റെ ചെറിയ വിടവ് പോലും അടച്ച് ഭദ്രമാക്കിയത് കണ്ട് ഞാന്‍ അത്ഭുതപ്പെട്ടു. ഇത് സ്ഥിരം ‘ഈ ആവശ്യത്തിന്’ നല്‍കുന്നത് തന്നെ എന്ന് തെളിഞ്ഞു!   ക്യാമറകള്‍ ഒന്നും തന്നെ റൂമില്‍ ഇല്ല എന്നും സൂക്ഷ്മനിരീക്ഷണത്തിലൂടെ ഞാന്‍ മനസ്സിലാക്കി.ജനല്‍ കര്‍ട്ടനുകള്‍ വലിച്ചാല്‍ നീങ്ങുന്നവയാണെന്നും പുറത്ത് നിന്നും ഒരു വിധത്തിലും അകത്തേക്ക് കാണില്ല എന്നും കൂടി ഒരു ധൈര്യത്തിനായി ഞാന്‍ ഉറപ്പ് വരുത്തി.എന്റെ ആദ്യരാത്രി (ക്ലിക്ക് ചെയ്താല്‍ വായിക്കാം!)യിലെ മുന്‍ അനുഭവങ്ങള്‍ ആണ് ഈ പാഠങ്ങള്‍ എന്നെ പഠിപ്പിച്ചത്. ആദ്യരാത്രി ആഘോഷിക്കുന്നതിന് മുമ്പ് ഇത്തരം കാര്യങ്ങള്‍ എല്ലാവരും ഉറപ്പ് വരുത്തുന്നത് നല്ലതായിരിക്കും.

            കിടക്കയില്‍ വിരിച്ച വെള്ള പുതപ്പും തലയിണയും എടുത്ത് ഞാന്‍ നന്നായി ഒന്നു കുടഞ്ഞു കൊട്ടി.ഇപ്പോള്‍ എല്ലാ സാധനങ്ങളിലും ചിപ്പ് ഉണ്ടാകാന്‍ സാധ്യത ഉണ്ട് എന്ന്  അഡ്വാന്‍സ്‌ഡ് ഇലക്ട്രോണിക്സ് സ്പെഷ്യലൈസേഷനോട് കൂടി എം.എസ്.സി ഫിസിക്സ് പഠിച്ച എന്റെ മനസ്സ് മന്ത്രിച്ചു. കട്ടികൂടിയ ഒരു കറുത്ത ബ്ലാങ്കറ്റില്‍ അവ്യക്തമായി കണ്ട ഒരു എഴുത്ത് ഇടക്ക് വെട്ടിത്തിളങ്ങിയത് എന്നില്‍ സംശയം ജനിപ്പിച്ചെങ്കിലും അത് മാനം കളയില്ല എന്ന് മനസ്സിലായി. ഞാന്‍ വാച്ചില്‍ നോക്കി.സമയം രാത്രി പത്തര മണി. മനസ്സിന്റെ മദനോത്സവത്തിന്റെ നിമിഷങ്ങള്‍ ആരംഭിക്കാന്‍ നിമിഷങ്ങള്‍ മാത്രം. ആ നിമിഷത്തെ ഹൃദയത്തിലേക്ക് ആവാഹിക്കാനായി അല്പ നേരം കണ്ണടച്ച് ഞാന്‍ ദൈവത്തോട് പ്രാര്‍ത്ഥിച്ചു.

             ഒരു ചൂളം വിളിയോടെ രാജ്യറാണീ എക്സ്പ്രെസ് നീങ്ങിത്തുടങ്ങിയതോടെ തീവണ്ടിയിലെ, സെക്ക്ന്റ് എ.സി ക്ലാസ്സില്‍ എന്റെ ആദ്യ യാത്രയും രാത്രിയും ആരംഭിച്ചു.

7 comments:

Areekkodan | അരീക്കോടന്‍ said...

എന്റെ ആദ്യരാത്രി (ഇവിടെ ക്ലിക്ക് ചെയ്താല്‍ വായിക്കാം!)യിലെ മുന്‍ അനുഭവങ്ങള്‍ ആണ് ഈ പാഠങ്ങള്‍ എന്നെ പഠിപ്പിച്ചത്.

© Mubi said...

എങ്ങോട്ടാ മാഷേ കള്ളവണ്ടി കയറിയത്??

Typist | എഴുത്തുകാരി said...

എന്റമ്മോ, സമ്മതിച്ചിരിക്കുന്നു.

Areekkodan | അരീക്കോടന്‍ said...

Mubi...കാളവണ്ടി അല്ല,ഞങ്ങളുടെ രാജ്യറാണീ എക്സ്‌പ്രെസിലാ കയറിയത്

Typist Chechi...വായനക്ക് നന്ദി!!

Cv Thankappan said...

രാജ്യറാണീ................
ആശംസകള്‍ മാഷെ

Muralee Mukundan , ബിലാത്തിപട്ടണം said...

ആദ്യം ചുമ്മാ ഒന്ന് കൊതിപ്പിച്ചു കേട്ടോ ഭായ്

Areekkodan | അരീക്കോടന്‍ said...

തങ്കപ്പേട്ടാ...നന്ദി.

ബിലാത്തിയേട്ടാ...പറ്റിച്ചേ!!!

Post a Comment

നന്ദി....വീണ്ടും വരിക