പേരക്ക ബുക്സ് എന്ന പുസ്തക പ്രസിദ്ധീകരണ സംരംഭവുമായി മാസങ്ങൾക്ക് മുമ്പാണ് ഞാൻ ബന്ധം സ്ഥാപിച്ചത്. എന്റെ ആദ്യ പുസ്തകം പ്രസിദ്ധീകരിക്കുന്നതുമായി ബന്ധപ്പെട്ട്, ചില കാര്യങ്ങൾ അറിയാനായി പേരക്ക ബുക്സിന്റെ സാരഥി ഹംസ ആലുങ്ങലുമായി മുമ്പ് ചർച്ച ചെയ്തിരുന്നെങ്കിലും ഇതിന്റെ കീഴിലുള്ള വാട്സ്ആപ്പ് ഗ്രൂപ്പിലും ബുക്ക് ക്ലബ്ബിലും എല്ലാം അംഗമായത് അടുത്ത കാലത്താണ്.പേരക്ക കുടുംബ സംഗമം എന്ന പേരിൽ കോഴിക്കോട്ട് വച്ച് നടത്തിയ ക്ലബ്ബ് അംഗങ്ങളുടെ ഒത്തുചേരലിൽ പങ്കെടുത്തപ്പോഴാണ് ഒരു പ്രസിദ്ധീകരണ സംരംഭത്തിന് ഇത്രയധികം ജനകീയമാകാൻ സാധിക്കും എന്നത് തിരിച്ചറിഞ്ഞത്. അതിനാൽ തന്നെ അതിനെ പ്രോത്സാഹിപ്പിക്കേണ്ടത് അനിവാര്യമായതിനാൽ പുസ്തകം വിൽക്കാൻ പോയ ഞാൻ കൈ നിറയെ പുസ്തകം വാങ്ങിയാണ് തിരിച്ചു പോന്നത്.പേരക്കയുടെ സമ്മാനമായി വേറെ കുറെ പുസ്തകങ്ങളും കൂടി ആ സംഗമത്തിൽ നിന്നും കിട്ടി.
കിട്ടിയ പുസ്തകങ്ങളിൽ ഞാൻ ആദ്യമായി വായിക്കാൻ തെരഞ്ഞെടുത്തത് ശ്രീ ഷഫീഖ് എൻ വി എഴുതിയ 'പല നിഴലുകളിൽ ഒരു മുഖം' എന്ന പുസ്തകമാണ്. മരുഭൂവിലെരിഞ്ഞ പച്ച മനുഷ്യരുടെ ജീവിത ഗന്ധിയായ കഥകൾ എന്ന ടൈറ്റിൽ ലൈൻ ആയിരിക്കാം ഈ തെരഞ്ഞെടുപ്പിന് കാരണം. ആട് ജീവിതം വായിച്ച ആരും മരുഭൂമിയിലെ ജീവിതങ്ങളെപ്പറ്റി വീണ്ടും വീണ്ടും വായിക്കാനും അറിയാനും ഇഷ്ടപ്പെടും എന്നത് തീർച്ചയാണ്.
അറേബ്യൻ ഉപഭൂഖണ്ഡത്തിലെ പ്രമുഖ രാജ്യങ്ങളായ യെമൻ, യു.എ.ഇ , ഖത്തർ എന്നിവിടങ്ങളിൽ എല്ലാം ജോലി നോക്കിയ ആൾ എന്ന നിലയിൽ മരുഭൂമിയിലെ അനുഭവങ്ങൾ കൊണ്ട് സമ്പന്നമായിരിക്കും കഥാകാരന്റെ ജീവിതവും എഴുത്തും എന്ന് ഞാൻ ഊഹിച്ചു. എന്റെ ഊഹം തെറ്റിയില്ല; ഈ പുസ്തകത്തിലെ ഏതാണ്ട് എല്ലാ കഥകളും കഥകളല്ല, മറിച്ച് കഥാകൃത്തിന്റെ അനുഭവങ്ങളാണ് എന്നാണ് എന്റെ വായനാനുഭവം.
സ്‌കൂളിൽ ഒരുമിച്ച് പഠിച്ച, പിന്നീട് കാലയവനികക്കുള്ളിൽ എവിടെയോ ഒളിച്ചിരുന്ന കളിക്കൂട്ടുകാരനെ തലശ്ശേരിയിൽ വച്ച് അപ്രതീക്ഷിതമായി കണ്ടുമുട്ടുന്ന അനുഭവ കഥയിൽ തുടങ്ങി, തന്റെ പ്രിയപ്പെട്ട അദ്ധ്യാപകനായ വേണു മാഷിന്റെ പ്രതീക്ഷകൾ തെറ്റിച്ചതിന്റെ പേരിൽ തലശ്ശേരിയിൽ വച്ച് തല കുനിക്കുന്ന അനുഭവ കഥയിൽ അവസാനിക്കുമ്പോൾ വായനക്കാരൻ അറേബ്യൻ ഉപഭൂഖണ്ഡത്തിലൂടെ ഒരു സഞ്ചാരവും നടത്തിക്കഴിഞ്ഞിരിക്കും! അങ്ങനെ ജീവിതത്തിലെ കുഞ്ഞു കുഞ്ഞു അനുഭവങ്ങൾ പെറുക്കി വച്ച പുസ്തകം നാം അറിയാതെ വായന പൂർത്തിയാക്കും.
ആദ്യ പുസ്തകം എന്ന നിലയിൽ വലിയ വീരവാദങ്ങൾ ഒന്നും ഈ പുസ്തകത്തെപ്പറ്റി രചയിതാവ് കൊട്ടിഘോഷിക്കുന്നില്ല. വായനക്കാരൻ എന്ന നിലക്ക് എനിക്കും എടുത്ത് പറയാവുന്ന ഒരു കഥ സൂചിപ്പിക്കാൻ പ്രയാസമാണ്. ഓരോ അനുഭവങ്ങളും അല്പം കൂടി മർമ്മവും നർമ്മവും കൂട്ടിയാൽ ഈ തലശ്ശേരിക്കാരനിൽ നിന്ന് ഇനിയും നല്ല കഥകൾ ഉറവെടുക്കും എന്ന പ്രതീക്ഷ ഈ പുസ്തകം നൽകുന്നു.
പുസ്തകം : പല നിഴലുകളിൽ ഒരു മുഖം
രചയിതാവ് : ഷഫീഖ് എൻ വി
പബ്ലിഷേഴ്സ് : പേരക്ക ബുക്സ്
പേജ് : 103
;വില : 130 രൂപ
3 comments:
ഓരോ അനുഭവങ്ങളും അല്പം കൂടി മർമ്മവും നർമ്മവും കൂട്ടിയാൽ ഈ തലശ്ശേരിക്കാരനിൽ നിന്ന് ഇനിയും നല്ല കഥകൾ ഉറവെടുക്കും എന്ന പ്രതീക്ഷ ഈ പുസ്തകം നൽകുന്നു.
നല്ല പരിചയപ്പെടുത്തൽ ..
മുരളിയേട്ടാ ... നന്ദി
Post a Comment
നന്ദി....വീണ്ടും വരിക