കായംകുളം സൂപ്പർഫാസ്റ്റ്

2006 ൽ ബ്ലോഗ് എന്ന മാസ്മരിക ലോകത്ത് കാലെടുത്ത് വച്ചത് മുതൽ ഞാൻ അസൂയയോടെ നോക്കുന്ന (കഷണ്ടി ആദ്യമേ ഉണ്ട്) ഒരു പേരായിരുന്നു അരുൺ കായംകുളം. കായംകുളം സൂപ്പർഫാസ്റ്റ് എന്ന പേരിൽ അറിയപ്പെടുന്ന, അരുണിന്റെ ബ്ലോഗിലൂടെയുള്ള വായനാ യാത്ര ശരിക്കും ചിരിയുടെ ഒരു നോൺ സ്റ്റോപ്പ് യാത്ര തന്നെയായിരുന്നു. ട്രെയിനിൽ ഒരു ബോഗി ഘടിപ്പിക്കുന്ന പോലെ ഓരോ കുഞ്ഞു കുഞ്ഞു സംഭവങ്ങൾ ഹാസ്യരൂപത്തിൽ കോർത്തിണക്കി വായനക്കാർക്ക് മുമ്പിൽ സമർപ്പിക്കുന്ന ആ രീതി അന്നത്തെ ബ്ലോഗർമാർക്കിടയിൽ തുലോം കുറവായിരുന്നു. അരുണിന്റെ അന്നത്തെ കാലത്തെ ഒരു പോസ്റ്റ് പോലും നൂറ് കമന്റുകളില്ലാതെ സ്ഥലം വിടാറില്ല എന്നാണ് എന്റെ ഓർമ്മ.

കാലക്രമേണ ബ്ലോഗുലകത്തിൽ നിന്നും ചില പുസ്തകങ്ങൾ പുറത്ത് വരാൻ തുടങ്ങി. 'ഇത്തിരിവെട്ടം' എന്ന തൂലികാ നാമത്തിൽ എഴുതിയിരുന്ന ശ്രീ. റശീദ് ചാലിലിന്റെ "സാര്‍ത്ഥവാഹക സംഘത്തോടൊപ്പം " എന്ന തുടർ രചനകളാണ് ഒരു പുസ്തക രൂപത്തിൽ ബ്ലോഗുലകത്ത് നിന്നും അച്ചടിമഷി പുരണ്ട ആദ്യ കൃതി എന്നാണ് എന്റെ വിശ്വാസം. 2010 ലാണ് ഒരു ബ്ലോഗർ കൂടിയായ ജോഹർ ഒരു പുസ്തക പ്രസാധന യജ്ഞം ആരംഭിക്കുകയും അതിലൂടെ കായംകുളം സൂപ്പർഫാസ്റ്റിനെ സൈബർ ലോകത്ത് നിന്നും പുസ്തക ലോകത്തേക്ക് ഇറക്കിവിടുകയും ചെയ്തത്.ഒരു വ്യാഴവട്ടം കൂടി കഴിഞ്ഞാണ് പ്രസ്തുത പുസ്തകം എന്നെ തേടി എത്തിയത്.

മുമ്പ് ബ്ലോഗിൽ വായിച്ച രചനകൾ ആയതിനാലും ഓർത്തോർത്ത് ആർത്തലച്ച് ചിരിക്കാനുള്ളതിനായാലും കായംകുളം സൂപ്പർഫാസ്റ്റിൽ കയറാൻ ഞാൻ പിന്നെയും ലേറ്റായി. അങ്ങനെ ഇരിക്കെ 2023 ലെ എന്റെ കട്ട ശപഥങ്ങളിൽ ഒന്നായ 'ഒരു മാസം രണ്ട് വീതം + ഒന്ന് ' എന്ന പുസ്തക വായനാശപഥം എന്നെ കുത്തി നോവിക്കാൻ തുടങ്ങി. കുത്ത് മാരകമായതോടെ ഞാൻ കായംകുളം സൂപ്പർഫാസ്റ്റിൽ ഓടിക്കയറി തൽക്കാലം രക്ഷ നേടി. വായന കഴിഞ്ഞപ്പോൾ ഒരു കുറിപ്പ് കൂടി എഴുതണം എന്നും തോന്നി.

അരുണിന്റെ ശൈലിയിൽ പറഞ്ഞാൽ 14 ബോഗികൾ ആണ് നിലവിൽ ഓടിക്കൊണ്ടിരിക്കുന്ന കായംകുളം സൂപ്പർഫാസ്റ്റിൽ ഉള്ളത്. എഴുത്തിന്റെ നീളം കൊണ്ട് എല്ലാ ബോഗിയും ടൈറ്റ് ലോഡാണ് എങ്കിലും കയറിയാൽ ഒരറ്റം മുതൽ മറ്റേ അറ്റം വരെ പോയി നോക്കാതെ ഇറങ്ങില്ല. മാത്രമല്ല അറ്റത്തെത്തിയാൽ അടുത്ത ബോഗിയിലേക്ക് കണ്ണെടുത്ത് വയ്ക്കും എന്നും തീർച്ചയാണ്. ജീവിതത്തിലെ കയ്പും മധുരവും ഇടകലർന്ന ഏടുകളാണ് നർമ്മത്തിൽ ചാലിച്ച് പതിനാല് ബോഗികളായി ഫിറ്റ് ചെയ്ത് കായംകുളം സൂപ്പർഫാസ്റ്റ് ആക്കിയിരിക്കുന്നത്.

ഞാൻ അഭ്യർത്ഥിച്ച പ്രകാരം എന്റെ ഹോം ലൈബ്രറിയിലേക്ക് , അരുൺ സൗജന്യമായി തന്നതാണ് ഈ പുസ്തകം എന്നതും സന്തോഷപൂർവ്വം അറിയിക്കുന്നു.

പുസ്തകം : കായംകുളം സൂപ്പർഫാസ്റ്റ്
രചയിതാവ്: അരുൺ കായംകുളം
വില: 65 രൂപ
പേജ്: 120
പ്രസാധകർ: Nb പബ്ലിക്കേഷൻ എറണാകുളം