ജീവിതത്തിൽ ഒരു മനുഷ്യൻ പല വളർച്ചാ ഘട്ടങ്ങളിലൂടെയും കടന്നു പോകാറുണ്ട്. ബാല്യം, കൗമാരം, യൗവനം , വാർദ്ധക്യം തുടങ്ങീ പ്രായം കൊണ്ട് കണക്കാക്കുന്നവയാണ് അത്. എന്നാൽ സാമൂഹ്യ ജീവിതത്തിൽ അതേ മനുഷ്യൻ വേറെ ധാരാളം ഘട്ടങ്ങളിലൂടെയും കടന്ന് പോകുന്നു. മകനായിരുന്ന അവൻ കല്യാണം കഴിക്കുന്നതോടെ ഒരു ഭർത്താവും കൂടി ആയി മാറുന്നു. ഏറെ താമസിയാതെ പലരും പിതാവും ആയി മാറും. പിന്നെയും ഇരുപതോ ഇരുപത്തഞ്ചോ വർഷങ്ങൾ പിന്നിടുന്നതോടെ അവൻ ഒരു അമ്മായിയപ്പൻ ആയി മാറും. കാലം അങ്ങനെ മുന്നോട്ട് ഗമിക്കുന്തോറും , ഈ പദവികൾ മാറിക്കൊണ്ടിരിക്കും.
ദിവസങൾക്ക് മുമ്പ് എനിക്കും ഇങ്ങിനെ ഒരു പദവിമാറ്റം കിട്ടി. ഇതുവരെ ഒരു പിതാവായിരുന്ന ഞാൻ , ആഗസ്ത് 15 ന് ഒരു മരുമകനെ സ്വീകരിച്ച് അമ്മായിയപ്പൻ കൂടിയായി. അത്ഭുതകരമെന്ന് പറയട്ടെ, അതോടെ വീട്ടിൽ എല്ലാവരുടെയും പദവികളും മാറി. എന്റെ ഭാര്യ ഒരു അമ്മായിമ്മയായി, മൂത്ത മകൾ ഒരു ഭാര്യയും മരുമകളുമായി ഡബിൾ പ്രമോഷൻ അടിച്ചു 😊. അവളുടെ അനിയത്തിമാർ രണ്ടും ഇളയിച്ചികളായി മാറി. എൻ്റെ ഏറ്റവും ചെറിയ മോനാണ് നല്ലൊരു പദവി കിട്ടിയത്. അവൻ ഒരു അളിയനായി മാറി😀
ഇന്ത്യ സ്വതന്ത്രയായ ആഗസ്റ്റ് 15 ന് ഞാൻ എന്റെ മോളെയും എൻ്റെ നിയന്ത്രണങ്ങളിൽ നിന്ന് സ്വതന്ത്രയാക്കി. അവൾ എത്തുന്നിടത്തുള്ള സ്വാതന്ത്ര്യം ഇനി അവർ അനുഭവിച്ച് പറയട്ടെ.
1 comments:
അങ്ങനെ അമ്മോച്ചനായി
Post a Comment
നന്ദി....വീണ്ടും വരിക