Pages

Sunday, October 01, 2017

പത്താം രക്തദാനം

                സന്നദ്ധരക്തദാനം ഇന്ന് കേരളത്തിലെ യുവാക്കള്‍ക്ക് പരിചയപ്പെടുത്തേണ്ട ആവശ്യം ഇല്ല.കാരണം യൂത്ത് ക്ലബ്ബുകളും യുവജന സംഘടനകളും മറ്റും അത്രയും പ്രചാരണം നല്‍കി ഇന്ന് അത് സര്‍വ്വജന സ്വീകാര്യമാക്കിയിട്ടുണ്ട്. എങ്കിലും സ്ത്രീകള്‍ക്കിടയിലും മധ്യവയസ്കര്‍ക്കിടയിലും ഇന്നും രക്തദാനത്തിന് മടി കാണിക്കുന്നവരുണ്ട്. എന്തോ ഒരു ഉള്‍ഭയമാണ് ഈ മടിക്ക് കാരണം എന്നതാണ് സത്യം.

                പ്രീഡിഗ്രിക്ക് പഠിക്കുമ്പോള്‍ ഹോസ്റ്റലില്‍ സഹതാമസക്കാരനായ എന്റെ സുഹൃത്ത് ശബീറിന്റെ മാതാവിന് വേണ്ടി രക്തം ദാനം ചെയ്താണ് ഞാന്‍ രക്തദാനം ആരംഭിച്ചത്. അടുത്തത് ഡിഗ്രിക്ക് പഠിക്കുമ്പോള്‍ കോഴിക്കോട് മെഡിക്കല്‍ കോളേജിലും. പിന്നീട് ആവശ്യക്കാര്‍ വന്നപ്പോഴെല്ലാം രക്തം ദാനം നല്‍കാന്‍ ശ്രമിച്ചിട്ടുണ്ട്.കൂടാതെ എന്റെ നേതൃത്വത്തില്‍ കോളേജില്‍ നടത്തിയ രക്തദാന ക്യാമ്പുകളില്‍ എല്ലാം ആദ്യം രക്തം നല്‍കി കുട്ടികളെ പ്രോത്സാഹിപ്പിക്കാനും ശ്രമിച്ചിട്ടുണ്ട്.

               ഇക്കഴിഞ്ഞ ഓണം അവധിയില്‍ മാനന്തവാടി ജില്ലാ ആശുപത്രിയില്‍ പുനര്‍ജ്ജനി ക്യാമ്പ് നടത്തുന്നതിനിടയില്‍ A+ve ഗ്രൂപ് രക്തം അടിയന്തിരമായി ആവശ്യമാണെന്ന് ഒരു സന്ദേശം രാവിലെത്തന്നെ ക്യാമ്പിലെത്തി. തലേ ദിവസം ക്യാമ്പിലെ വളണ്ടിയര്‍ ജിന്‍ഷാദ് പതിനെട്ടാമത്തെ രക്തദാനവും അശ്വനി അജയകുമാര്‍ രണ്ടാം രക്തദാനവും നിര്‍വ്വഹിച്ചിരുന്നു.
                  ബ്ലഡ് ബാങ്കില്‍ ഓടി എത്തിയെങ്കിലും ടെക്നീഷ്യന്‍ ചായ കുടിക്കാന്‍ പോയിരുന്നതിനാല്‍ ഞാന്‍ ക്യാമ്പ് ഓഫീസിലേക്ക് തന്നെ മടങ്ങി.പക്ഷെ എന്നെ പ്രതീക്ഷയോടെ കാത്ത് നിന്ന രോഗിയുടെ ബന്ധുക്കളെ ഞാന്‍ അവിടെ കണ്ടു. ടെക്നീഷ്യന്‍ തിരിച്ചു വന്ന ഉടനെ ഞാന്‍ വീണ്ടും  ബ്ലഡ് ബാങ്കില്‍ എത്തി രക്തം ദാനം ചെയ്തു. എന്റെ  പത്താമത്തെ  രക്തദാനമാ യിരുന്നു അത് എന്നാണ് എന്റെ ഓര്‍മ്മ.
                  ദേശീയ രക്തദാന ദിനത്തില്‍ ഇന്ന് നിരവധി പുതിയ ദാതാക്കള്‍ ഈ സേവനത്തിന് തയ്യാറായിട്ടുണ്ടാകും എന്ന് തീര്‍ച്ചയാണ്. എല്ലാ ദാതാക്കള്‍ക്കും ആശംസകള്‍ നേരുന്നു.
  

3 comments:

Areekkodan | അരീക്കോടന്‍ said...

രക്തദാനം ജീവന്‍ ദാനം

Cv Thankappan said...

രക്തദാനം മഹാദാനം
ആശംസകള്‍ മാഷേ

Areekkodan | അരീക്കോടന്‍ said...

തങ്കപ്പേട്ടാ...നന്ദി

Post a Comment

നന്ദി....വീണ്ടും വരിക