എല്ലാവരും വീണ്ടും ഒത്തു ചേർന്നതോടെ മഞ്ഞിൽ നിന്നുള്ള ഏതാനും ഫോട്ടോകൾ എടുക്കാനായി ഞങ്ങൾ നീങ്ങി. കൃത്യ സമയത്ത് തന്നെ ഒരു ഫോട്ടോഗ്രാഫർ ഞങ്ങളുടെ മുന്നിലെത്തി.
"സാർ... ഫോട്ടോ മാർന ?"
"കിത് ന ഹോഗ?'
"ഏക് കൊ പച്ചാസ്"
"സിർഫ് പച്ചാസ് ?"
"ഹാം ജീ .... ആപ്കോ മൊബൈൽ മേം ബേച്ച് ദുംഗ"
അപ്പോഴാണ് താജ് മഹൽ, ഇന്ത്യാ ഗേറ്റ് എന്നിവിടങ്ങളിൽ നിന്ന് വ്യത്യസ്തമായി ഫോട്ടോ പ്രിൻ്റ് ചെയ്ത് നൽകാതെ ഡിജിറ്റൽ കോപ്പിയാണ് നൽകുന്നത് എന്ന് മനസ്സിലായത്. യഥാർത്ഥത്തിൽ അത് തന്നെയാണ് ഞങ്ങൾക്ക് വേണ്ടിയിരുന്നതും.പരിചയ സമ്പന്നനായ ഫോട്ടോഗ്രാഫർ ആയതിനാൽ പല പോസിലും ഫോട്ടോ എടുത്ത് കാണിച്ച് തന്ന ശേഷം അതിൽ നിന്ന് ആവശ്യമായത് തെരഞ്ഞെടുക്കാൻ പറഞ്ഞു. ഇഷ്ടപ്പെട്ട നാലെണ്ണം മക്കൾ അതിൽ നിന്നും തെരഞ്ഞെടുത്തു.
ഹഡിംബ ക്ഷേത്രത്തിലേക്ക് പോകുന്ന വഴിയിൽ കണ്ടത് പോലെ യാക്കുകൾ ഇവിടെയും ഉണ്ടായിരുന്നു. പുറത്ത് കയറി ഏതാനും ദൂരം ചുറ്റി വരാൻ നൂറ് രൂപയായിരുന്നു ചാർജ്ജ്.പുറത്ത് കയറി ഫോട്ടോ എടുത്താൽ മാത്രം മതി എന്നറിയിച്ചപ്പോൾ അമ്പത് രൂപക്ക് കാര്യം സാധിച്ചു. ചെറിയ മക്കളെ രണ്ടു പേരെയും ഓരോ യാക്കിൻ്റെ പുറത്ത് കയറ്റി ആവശ്യമായ ഫോട്ടോകൾ എടുത്ത ശേഷം ഞങ്ങൾ തിരിച്ച് പോരാൻ തീരുമാനിച്ചു.
പെട്ടെന്നാണ് കാലാവസ്ഥ വീണ്ടും മാറിയത്. സീറോ പോയിൻ്റിൽ അനുഭവിച്ച പോലെ മഞ്ഞു പൂക്കൾ ഞങ്ങളുടെ ശരീരത്തിൽ പതിക്കാൻ തുടങ്ങി. അൽപ സമയത്തിനകം തന്നെ അത് ശക്തി കൂടി മഞ്ഞ് വീഴ്ചയായി മാറി.മഞ്ഞു പൂക്കൾ ശരീരത്തിൽ ഏറ്റുവാങ്ങിക്കൊണ്ട് ഞങ്ങൾ അത് നന്നായി ആസ്വദിച്ചു. അതോടെ റോതാങ്ങ് സന്ദർശനം ശരിക്കും അർത്ഥപൂർണ്ണമായി.
കോതി ഗ്രാമവും ബേ വെള്ളച്ചാട്ടവും കാണണം എന്ന് മഹേഷിനോട് ഞാൻ നേരത്തെ സൂചിപ്പിച്ചിരുന്നു.എൻ്റെ തുടർച്ചയായ ചുമ കാരണം ഡ്രൈവർ രവിക്ക് വീണ്ടും ആശങ്ക തോന്നി. പർവ്വതത്തിൻ്റെ മുകളിലെ മർദ്ദവ്യത്യാസം കാരണമുള്ള പ്രശ്നങ്ങളാണെന്നായിരുന്നു രവിയുടെ ധാരണ. നാലഞ്ച് ദിവസമായി തുടരുന്നതാണ് ഈ ചുമ എന്ന് ഞാൻ രവിയെ ധരിപ്പിച്ചു.
വന്ന വഴിയെ തിരിച്ചു പോകാതെ മർഹി വഴിയായിരുന്നു രവി തിരിച്ചിറങ്ങിയത്. മടക്കയാത്ര തുടങ്ങി അൽപം കഴിഞ്ഞപ്പോൾ തന്നെ എല്ലാവരും ഉറക്കം തുടങ്ങി. പുറത്ത് മഞ്ഞ് മഴ കൂടുതൽ ശക്തമായി. കോതിയും ബേ വെള്ളച്ചാട്ടവും സന്ദർശന ഷെഡ്യൂളിൽ നിന്നും ഞാൻ ഒഴിവാക്കി. അപകടരമായ വളവുകളും തിരിവുകളും നിറഞ്ഞ റോഡിലൂടെ രവി അനായാസം ഞങ്ങളെ താഴെ എത്തിച്ചു. വാടകക്കെടുത്ത കോട്ടും ഷൂസുകളും തിരിച്ചേല്പിച്ച ശേഷം ഞങ്ങൾ വസിഷ്ട് ഹോട്ട് സ്പ്രിംഗ് കാണാനായി നീങ്ങി.
(തുടരും..)
1 comments:
മഞ്ഞിൽ വിരിഞ്ഞ പൂക്കൾ ......
Post a Comment
നന്ദി....വീണ്ടും വരിക