Wednesday, August 22, 2007
അബുവിന്റെ കന്നിപ്രകടനം
വണ്ടിക്കാരന്‍ സൈതാലിക്ക സലാം പറഞ്ഞിറങ്ങിയപ്പോള്‍ അബുവിന്റെ മനസ്സില്‍ ഒരു കൊള്ളിയാന്‍ മിന്നി.'അറ്യാത്ത നാട്‌....അറ്യാത്ത ആള്‍ക്കാര്‌...അറ്യാത്ത പണി...പെരേന്ന്‌* എറങ്ങി പൊറപ്പെടാന്‍ കൊയപ്പം* ഇല്ലെയ്നി....ബയീല്‌* ആപ്പാന്റെ ഒപ്പം നിന്നാലും മത്യെയ്നി....ഔട്ന്നും ബ്ട്ട്‌...ഒട്ക്കം അര്‍മാന്‍ മോല്യാര് പറഞ്ഞെ കേട്ടപ്പം.......അപ്പം തന്നെ മോല്യാരൊപ്പം കൂട്യാലും മത്യെയ്നി....ആര്‍ക്കും മാണ്ട്യാണോ ഞാന്‍ നാട്‌ ബ്ട്ടത്‌ ഓളെ തന്നെ കെട്ടിച്ച്‌ തരാന്‍ മോല്യാര് നടക്ക്ണ സിതിക്ക്‌* ഇച്ച്‌ കല്ലായിന്റെ അട്ത്ത സോപ്പ്‌ലെറങ്ങി* നാട്ട്ക്കെന്നെ ബ്ട്ട മത്യെയ്നി....പാവം ഇമ്മ....ഇന്നലെ ഒറങ്ങീക്ക്ണോ ആവോ ?' ആലോചിച്ചപ്പോള്‍ അബുവിന്റെ കണ്ണില്‍ നിന്നും കണ്ണീര്‍ പൊടിഞ്ഞു.
"അബോ.." കോയാക്കയുടെ വിളി കേട്ട്‌ അബു ചിന്തയില്‍ നിന്നും ഞെട്ടിയുണര്‍ന്നു.
"എത്താ..."
"നീ എന്താ ആലോചിക്കുന്നത്‌?"
"എത്തുംല്ല"
"നിന്റെ കാര്യങ്ങളൊക്കെ സൈതാലി എന്നോട്‌ പറഞ്ഞിട്ടുണ്ട്‌...സൈതാലിം ഞാനും തമ്മില്‌ പല എടവാടുകളും ഉള്ളതോണ്ടാ ഓന്‍ പറഞ്ഞപ്പം ഞാന്‍ നിന്നെ ഇവിടെ നിര്‍ത്ത്യെത്‌...അല്ലെങ്കി നാടും വീടും വിട്ട്‌ വരുന്ന അലവലാതി കേസുകള്‍ക്കൊന്നും ഞാന്‍ നിന്ന്‌ കൊട്ക്കല്ല്ള"
"ഉം" അബു മൂളി കേട്ടു.
"നീ ഒര്‌ യത്തീമും കൂട്യാന്ന്‌ അര്‍ഞ്ഞപ്പം , ഇന്റെ ഖല്‍ബ്‌ പെടഞ്ഞു..."
"ഉം"
"അബോ...ദാ...ആ പാത്രോം ഗ്ലാസ്സോംക്കെ ബട്ക്കണീക്ക്‌* കൊണ്ടെ വച്ച്‌ കൊട്‌....ആയ്ശോ...ആയ്ശൂ...ഇതൊക്കെന്ന്‌ വൃത്ത്യാക്ക്യാ..."അബു മേശയിലെ പാത്രങ്ങളും ഗ്ലാസ്സും അടുക്കി.രണ്ടും കൂടി ഒരുമിച്ച്‌ കൊണ്ടുപോകാന്‍ പരിശീലനം ഇല്ലാത്തതിനാല്‍ ഓരോന്നായി അടുക്കളയില്‍ എത്തിച്ചു.
അല്‍പ സമയത്തിനകം കോയാക്കയുടെ പെണ്ണുമ്പിള്ള ആയ്ശുമ്മാത്ത ഒരു ശീലക്കഷ്ണവും വേസ്റ്റ്‌ തട്ടാനുള്ള പാത്രവുമായി എത്തി.
"ഇതേതാ പുതിയൊര്‌ ചെക്കന്‍ ?" അബുവിനെ കണ്ട ആയ്ശുമ്മാത്ത ചോദിച്ചു.
"ആ..ഇവന്റെ പേര് അബു...ഞമ്മളെ സൈതാലി കൊണ്ടന്നതാ...."
"ആ...നന്നായി....പക്ഷേങ്കില്‌ ഞമ്മളെ പഴേ ചെക്കന്‍ ബാബൂന്റെ മാതിരി...."
"ഏയ്‌...സൈതാലി ഗ്യാരണ്ടി തന്നതാ..."
"ഉം..."
'നല്ലെ ശേല്‍ള്ളൊര്‌ ചെക്കന്‍....ഏതോ ഒര്‌ നല്ല കുടുംബത്ത്ന്ന്ള്ളതാ...ആ...കാത്തിര്‍ന്ന്‌ കാണാം...'മേശ തുടക്കുന്നതിന്നിടയില്‍ ആയ്ശുമ്മാത്ത അബുവിനെ നോക്കി മനസ്സില്‍ മന്ത്രിച്ചു.
"അബോ അന്റെ പണി ...ഈ മക്കാനീല്‌ വരുന്നോര്‍ക്ക്‌ ആവശ്യംള്ള ഭക്ഷണം കൊട്ക്കാ...പിന്നെ......പാത്രോം ഗ്ലാസ്സോംക്കെ ബട്ക്കണീക്കെത്തിക്കാ....മേശ വൃത്ത്യാക്ക....പിന്നെ ഞമ്മള്‍ ഇല്ലെങ്കി , കാശ്‌ വാങ്ങലും അന്റെ പണ്യാ...."
"ഉം"
"കോയാക്കാ....അസ്സലമലൈക്കും..." രണ്ട്‌ പേര് വന്ന്‌ കോയാക്കയോട്‌ സലാം പറഞ്ഞു.
"വലൈകുമുസ്സലാം....കുത്തിരിക്ക്‌*....."
"ആരാത്‌....പുതിയ അപ്രന്റീസ്‌,കോയാക്കാ...." ആഗതര്‍ അബുവിനെ കണ്ട്‌ ചോദിച്ചു.
"ആ പുത്യേ അപ്പോയിന്റ്മെന്റാ....അബോ ഓല്‍ക്ക്‌* എന്താ വേണ്ട്യേന്ന്‌ നോക്ക്‌...." അബു ആഗതരുടെ മേശക്ക്‌ അടുത്ത്‌ ചെന്ന്‌ നിന്നു.
"എന്താ കഴിക്കാനുള്ളത്‌...?" ആഗതര്‍ ചോദിച്ചു.അബു ഒന്ന്‌ ഞെട്ടി.
'മക്കാനീല്‌ കഴിക്കാനുള്ളതെന്തൊക്ക്യാന്ന്‌ ഇത്ബെരെ കോയാക്ക പറഞ്ഞ്‌ തെന്ന്ട്ട്ല്ല....ഞാനായിട്ട്‌ നോക്കീട്ടും ല്ല...' അബു ആലോചിച്ചു.അപ്പോഴാണ്‌ അവന്‍ കഴിച്ച ഭക്ഷണത്തെപ്പറ്റിയും രാവിലെത്തെ കോയാക്കയുടെ സംസാരവും ഓര്‍മ്മ വന്നത്‌.....ഉടന്‍ അബു പറഞ്ഞു.
"നല്ല ആവി പറക്ക്ണ ബോട്ടിം പൂളേം ണ്ട്‌.....രണ്ട്‌ പ്ലേറ്റ്‌ എട്ക്കട്ടെ..."
"ആഹാ.....എന്നാ രണ്ട്‌ പ്ലേറ്റ്‌ ഇങ്ങ്‌ പോരട്ടെ....കോയാക്കാ പുത്യേ അപ്പ്രന്റീസ്‌ ആള്‌ കൊള്ളാലോ..."
അബുവിനെ ശ്രദ്ധിച്ചുനിന്ന കോയാക്കാക്കും അബുവിന്റെ ആദ്യപ്രകടനം ഇഷ്ടപ്പെട്ടു.രണ്ട്‌ പ്ലേറ്റ്‌ വീതം ബോട്ടിയും പൂളയും വെള്ളവും മേശപ്പുറത്തെത്തിച്ച്‌ അബു അടുത്ത ആള്‍ക്കാര്‍ക്കായി കാത്ത്‌ നിന്നു.
(തുടരും )
***********************************************
പെരേന്ന്‌ = വീട്ടില്‍ നിന്ന്‌
കൊയപ്പം = കുഴപ്പം
ബയീല്‌ = വഴിയില്
സിതി = സ്ഥിതി
സോപ്പ്‌ലെറങ്ങി = സ്റ്റോപ്പ്‌ലിറങ്ങി
ബട്ക്കണ്‍ = അടുക്കള
കുത്തിരിക്ക്‌ = ഇരിക്കൂ
ഓല്‍ക്ക്‌ = അവര്‍ക്ക്‌
5 comments:
അബുവിന്റെ കന്നിപ്രകടനത്തിനൊരു തേങ്ങ ഇരിക്കട്ടേ.
“ഠേ!”
:)
:)
label കൊടുത്തതിനു നന്ദി! ഞാനിനി പോയി ആദ്യഭാഗം മുതല്‍ വായിക്കട്ടെ :p
kollam :)
ഇതുവരെയുള്ളത്‌ മുഴുവനും വായിച്ചു. നന്നായിട്ടുണ്ട്‌. അബു ഇനി എങ്ങോട്ട്‌?
Post a Comment
നന്ദി....വീണ്ടും വരിക