ലിഡർ നദി ചുവയ്ക്കുമ്പോൾ

ആട്ടിടയന്മാരുടെ താഴ്വര എന്നാണ് പഹൽഗാം അറിയപ്പെടുന്നത്. ആടുകളെപ്പോലെ തന്നെ നിഷ്കളങ്കമായ മനസ്സുള്ള ഒരു പറ്റം ജനങ്ങളാണ് ഇവിടത്തെ താമസക്കാർ.മിക്കവരുടെയും ജോലി ആടുമേക്കൽ തന്നെയാണ്.  പച്ച പുതച്ച് നിൽക്കുന്ന കുന്നുകളും പൈൻ മരങ്ങളും ദേവദാരു മരങ്ങളും ആപ്പിൾ തോട്ടങ്ങളും ഡെയ്സി പൂക്കൾ നിറഞ്ഞ് നിൽക്കുന്ന പുൽമേടുകളും മഞ്ഞ് പുതച്ച മലകളും ക്രിസ്റ്റൽ ക്ളീൻ ലിഡർ നദിയും ചേർന്ന്  സൃഷ്ടിച്ചെടുക്കുന്ന പ്രകൃതിയുടെ നിറക്കൂട്ട് സഞ്ചാരികളുടെ മനസ്സിൽ പഹൽഗാമിനോട് പെട്ടെന്ന് തന്നെ പ്രണയം ജനിപ്പിക്കും. പൈൻ മരങ്ങൾക്കിടയിൽ ചുറ്റിത്തിരിഞ്ഞെത്തുന്ന മഞ്ഞ് കാറ്റും മഞ്ഞുരുകി ഒലിച്ചിറങ്ങി വരുന്ന ലിഡർ നദിയുടെ തണുപ്പും കൂടിയായാൽ സഞ്ചാരികളുടെ മനസ്സ് ഉന്മാദ നൃത്തമാടും.

പതിവ് പോലെ ഇന്നലെയും ആടുകളെ മേയ്ച്ചു കൊണ്ട് ആട്ടിടയന്മാർ കുടുംബ സമേതം ആ നദീ പരിസരത്ത് ഉണ്ടായിരുന്നു.അവരുടെ കുട്ടികൾ സഞ്ചാരികളെ നോക്കി നിഷ്കളങ്കമായി പുഞ്ചിരിക്കുന്നുണ്ടായിരുന്നു .ഈ പുഴക്കും നാടിനും അപ്പുറമുള്ള ലോകം അവർക്ക് അറിയുകയേ ഇല്ല.സ്കൂളുകളോ പാഠപുസ്തകങ്ങളോ അലട്ടാത്ത മനസ്സുമായി ആ കുഞ്ഞുങ്ങൾ ആ നദീതടത്തിൽ അലഞ്ഞു നടക്കുന്ന കാഴ്ച മനസ്സിനെ നീറിപ്പുകയ്ക്കുന്നു.ഇങ്ങനെ  ഒരു വിഭാഗം ലോകത്തെല്ലായിടത്തുമുണ്ട്.വലിയ വലിയ ആഗ്രഹങ്ങളില്ലാത്ത, ഒന്നോ രണ്ടോ കുതിരപ്പുറത്തൊതുങ്ങുന്ന സമ്പാദ്യങ്ങൾ മാത്രമുള്ള, ഒരു നൊമാഡിക് അഥവാ നാടോടി ജനത.

ആ ജനതയുടെ നെഞ്ചിലേക്ക് കൂടിയാണ് ബൈസരൺവാലിയിൽ ഭീകരർ ഇന്നലെ വെടിയുതിർത്തത്.വർഷങ്ങളായി പ്രയത്നിച്ചിട്ടും ജീവിതത്തിന്റെ രണ്ടറ്റം മുട്ടിക്കാൻ പ്രയാസപ്പെടുന്ന ബകരീ വാലകളും ഘോഡ വാലകളും ചോര ചിന്തിയ വാലിയെ നോക്കി കണ്ണീരുതിർക്കുന്നു.ഒരു മാസം മുമ്പ് പഹൽഗാമിലെ ടാക്സി ഡ്രൈവർ നസാഖത്ത് ഖാൻ എന്നോട് പങ്കു വെച്ച സ്വപ്‌നങ്ങൾ മരീചികകളായി മാറിയിരിക്കുന്നു. എമറാൾഡ് ഗ്രീൻ നിറത്തിലുള്ള അതി സുന്ദരിയായ ലിഡർ നദി ചുവന്നു തുടുത്തിരിക്കുന്നു. നദിയിലെ വെള്ളത്തിന്റെ മരവിപ്പിക്കുന്ന തണുപ്പ് ബൈസരൺ വാലിയിൽ ചലനമറ്റുപോയവരുടെ രക്തത്തിന്റേത് കൂടിയാണ് എന്ന് ഞാൻ തിരിച്ചറിയുന്നു. ഉരുളൻ പാറക്കല്ലുകൾ ചിതറിക്കിടക്കുന്ന ആ നദീ തടത്ത് എത്ര നേരമിരുന്നാലും മതി വരാറില്ല. പക്ഷേ,ഇന്നലെ മുതൽ ആ നദിയിലേക്ക് നോക്കാൻ പോലും  മനസ്സിന് കരുത്തില്ല.

സ്വന്തം ഭർത്താവിന്റെ ചേതനയറ്റ ശരീരത്തിനടുത്തിരുന്ന് വിതുമ്പുന്ന ആ സ്ത്രീയുടെ കാഴ്ച ഹൃദയമുള്ള എല്ലാവരുടെയും കണ്ണിൽ വെള്ളം നിറയ്ക്കും.എത്ര എത്ര സ്വപ്‌നങ്ങൾ നെയ്തിട്ടായിരിക്കും അവർ സ്വന്തം വീട്ടിൽ നിന്നും ഭൂമിയിലെ ഈ സ്വർഗ്ഗത്തിൽ എത്തിയിട്ടുണ്ടാവുക.അതിന്റെ വേദന അറിയാൻ ആ നിസ്സഹായത നമുക്കാണ് വന്നത് എന്ന് ഒരു വേള ചിന്തിച്ചാൽ മാത്രം മതി.മറ്റേതോ നാട്ടിൽ നിരപരാധിയായി മരിച്ചു വീണ ആ യുവാവിന്റെ കുടുംബത്തിന്റെ അവസ്ഥ ആലോചിച്ചാലും മതി.

നിരപരാധികൾക്ക് നേരെയുള്ള ആക്രമണം, അത് എന്തിന്റെ പേരിലാണെങ്കിലും അങ്ങേയറ്റം ക്രൂരമാണ്. അക്രമികൾ  മാതൃകാപരമായി തന്നെ ശിക്ഷിക്കപ്പെടണം.ലിഡർ നദി ചുവയ്ക്കുമ്പോൾ,ചില മുൻ ഭീകരാക്രമണങ്ങൾ നടന്ന സമയവുമായി ഇതിനെ താരതമ്യം ചെയ്താൽ ഒരു സംശയം കൂടി ബലപ്പെടുന്നു. രാജ്യത്തെ പ്രമുഖ ന്യൂനപക്ഷത്തിന്റെ അവകാശങ്ങളിൽ കടന്നുകയറ്റം നടത്തുന്ന വഖഫ് ബില്ലിനെതിരെ രാജ്യവ്യാപകമായി പ്രതിഷേധം നടക്കുന്ന സാഹചര്യത്തിൽ ഒരു ശ്രദ്ധ തിരിക്കൽ ശ്രമം ഇതിന്റെ പിന്നിലുണ്ടോ? "ഇല്ല... ഒരിക്കലും ഇല്ല" എന്നായിരിക്കട്ടെ അതിന്റെ ഉത്തരം.

ബൈസരൺ വാലിയിൽ വെടിയേറ്റു മരിച്ചവർക്ക് മുമ്പിൽ നമ്രശിരസ്കനായി കൈകൂപ്പുന്നു;ആദരാജ്ഞലികൾ അർപ്പിക്കുന്നു.