ഡൽഹി യാത്രയെപ്പോലെ മണാലി ട്രിപ്പും ഞാൻ നന്നായി മനസ്സിലാക്കിത്തന്നെ ഷെഡ്യൂൾ ചെയ്തിരുന്നു. ഡൽഹിയിലെ പര്യടനത്തിനിടയിലെ രണ്ട് ദിവസം ആയതിനാൽ സമയത്തെ മാക്സിമം ഉപയോഗപ്രദമാക്കുക എന്നതായിടുന്നു പ്രധാന കടമ്പ.അതിന് ഏറ്റവും അനുയോജ്യമായ മാർഗ്ഗം പകൽ മുഴുവൻ ഡൽഹിയിൽ കറങ്ങി രാത്രി മണാലിയിലേക്ക് തിരിക്കുക എന്നതായിരുന്നു. രാവിലെ മണാലി എത്തും എന്നതിനാൽ അന്ന് തന്നെ കാഴ്ചകൾ കാണാനും സാധിക്കും. രാത്രി നിരവധി വോൾവോ എ സി സെമി സ്ലീപ്പർ ബസ്സുകൾ സർവ്വീസ് നടത്തുന്നുമുണ്ട്.
ഓരോ ട്രാവൽസ്കാർക്കും ഓരോ റേറ്റ് ആയതിനാൽ ബസ് തെരഞ്ഞെടുപ്പ് അത്ര എളുപ്പമായിരുന്നില്ല. മാത്രമല്ല സീറ്റിൻ്റെ സ്ഥാനം അനുസരിച്ചും ടിക്കറ്റ് നിരക്കിൽ വ്യത്യാസമുണ്ട്. റോഡിൻ്റെ സ്ഥിതി അറിയാത്തതിനാൽ റേറ്റ് കുറഞ്ഞ ബാക്ക് സീറ്റുകൾ ആദ്യം തന്നെ ഞാൻ ഒഴിവാക്കി. റിവ്യൂവും റേറ്റിംഗും സാധാരണ നോക്കാത്ത എനിക്ക് ഇത്തവണ അതും ഉപയോഗപ്പെടുത്തേണ്ടി വന്നു. എന്നിട്ടും തീരുമാനം ബുദ്ധിമുട്ടായതിനാൽ ഒരു മാസം മുമ്പ് മണാലി സന്ദർശിച്ച അനുജൻ്റെ ഉപദേശങ്ങളും ഞാൻ തേടി. അങ്ങനെ പി.എ.എൽ ട്രാവത്സിൽ ഒരാൾക്ക് 1100 രൂപ എന്ന നിരക്കിൽ ടിക്കറ്റ് ബുക്ക് ചെയ്തു.
ഒരു സ്ഥലം സന്ദർശിക്കുമ്പോൾ അവിടെ ഒരു പരിചയക്കാരനുണ്ടെങ്കിൽ അപ്രതീക്ഷിതമായ ധാരാളം സൗകര്യങ്ങൾ നമുക്ക് ലഭിക്കും. ഡൽഹിയിൽ ശ്രീജിത്ത് എന്ന കൂട്ടുകാരനിലൂടെയും കാശ്മീരിൽ എൻ്റെ സ്റ്റുഡൻ്റ് ഇഷ്ഫാഖിലൂടെയും ജയ്പൂരിൽ എൻ്റെ വീടിൻ്റെ മാർബിൾ പണിക്കാരൻ്റെ അനിയൻ അമീനിലൂടെയും എല്ലാം ഞാനത് നേരിട്ടനുഭവിച്ചതാണ്. ഹിമാചലിലും ഇങ്ങനെ ഒരു ബന്ധം എനിക്കുണ്ടായിരുന്നു.
കോഴിക്കോട് ഗവ. എഞ്ചിനീയറിംഗ് കോളേജിലെ ഏക് ഭാരത് ശ്രേഷ്ട് ഭാരത് ക്ലബിൻ്റെ കോർഡിനേറ്ററായിരിക്കെ ഹിമാചൽ പ്രദേശിലെ സുന്ദർനഗർ ഗവ. പോളിടെക്നിക്കുമായിട്ടായിരുന്നു ഞങ്ങളുടെ ടൈ അപ്പ്. പ്രസ്തുത കോളേജിൽ ഇതേ പദവിയിലുള്ള സോണൽ മാഡം മണാലിക്കടുത്താണ് താമസം എന്ന് പറഞ്ഞിരുന്നു. ആയതിനാൽ ഈ യാത്രയിൽ ആദ്യമായി അവരെ കാണാനും പറ്റുമെങ്കിൽ ഒരു ദിവസം അവിടെ തങ്ങാനും ഞാൻ ഉദ്ദേശിച്ചിരുന്നു. പക്ഷേ, മണാലിയിലേക്കുള്ള റൂട്ടിലെ മണ്ടിയിൽ ആണ് അവരെന്നും ഞങ്ങളുടെ ബസ് പുലർച്ചെ നാല് മണിക്കാണ് അതിലൂടെ കടന്ന് പോകുന്നതും എന്നതിനാൽ ആ പ്ലാൻ നടന്നില്ല. എങ്കിലും കാണാനുള്ള സ്ഥലങ്ങളെപ്പറ്റി അൽപം കൂടി നല്ലൊരു ധാരണ ഉണ്ടാക്കാൻ ഈ ബന്ധം ഉപകരിച്ചു.
മണാലിയിൽ എത്തിയ ശേഷം വിവിധ സ്ഥലങ്ങളിലേക്ക് പോകാനുള്ള ടാക്സി എല്പിക്കലായിരുന്നു മറ്റൊരു കടമ്പ. ഡൽഹിയിൽ നിന്ന് തുടങ്ങി തിരിച്ച് ഡൽഹി വരെ എത്തുന്ന ഒരു പാക്കേജ് ഒരു ഡൽഹി വാല ടൂർ ഓപ്പറേറ്ററും മണാലിയിൽ മാത്രം ഒതുങ്ങുന്ന ഒരു പാക്കേജ് ഒരു മലയാളി ടൂർ ഓപ്പറേറ്ററും തന്നെങ്കിലും രണ്ടും ഉയർന്ന നിരക്കാണെന്ന് അനിയൻ്റെ അനുഭവത്തിൽ നിന്ന് അവൻ പറഞ്ഞു.
അവസാനം, അനിയന് റൂം സെറ്റാക്കിക്കൊടുത്ത നാട്ടുകാരനായ ടൂർ ഓപ്പറേറ്റർ തന്നെ ഞങ്ങൾക്കും വളരെ സൗകര്യപ്രദമായ ഒരു റൂം സെറ്റാക്കി തന്നതോടെ വണ്ടിയുടെ കാര്യം മാത്രം നോക്കിയാൽ മതി എന്നായി.അതും ഓൺലൈനിൽ ഒരു ഓപ്പറേറ്ററുമായി സംസാരിച്ച് ഞാൻ ഡീലാക്കി. പക്ഷെ, അയാൾ അഡ്വാൻസ് ചോദിച്ചതിനാൽ ഞാനൊന്ന് പിന്നോട്ട് നിന്നു. ആ തീരുമാനവും നന്നായി എന്ന് ഡൽഹിയിൽ ഞാൻ എത്തിയ ദിവസം തിരിച്ചറിഞ്ഞു.
മെയ് 27 ന് ഡൽഹിയിൽ ഇറങ്ങി ഒന്ന് കറങ്ങിയ ശേഷം റൂമിലേക്ക് പോകാനായി മോളെ കാത്ത് നിൽക്കെ ഒരു അജ്ഞാത നമ്പറിൽ നിന്നും എനിക്ക് ഒരു വിളി വന്നു.
"സർ.... മേരാ നാം മഹേഷ്... മണാലി സെ ... ആപ് പി.എ എൽ ട്രാവൽസ് മേം മണാലി ആതാ ഹേ ന ?"
"ഹാം.." ഞാൻ മറുപടി പറഞ്ഞു.
"ആപ് ടാക്സി ഔർ ഹോട്ടൽ ബുക്ക് കിയാ യാ നഹി ?"
"റൂം കിയാ... ലേകിൻ ടാക്സി നഹീം.."
"അച്ചാ... സാർ ആപ് കിത് നെ ലോഗ് ഹെ?"
"സാത്..."
"അച്ച... സാത് ലോഗ് കെലിയെ എക് എർട്ടിഗ അച്ച ഹെ..."
"ഹാം ... ആപ് ബോലോ ... കിത്ന ഹോഗ?" പിടിവള്ളി കിട്ടിയ ആശ്വാസത്തിൽ ഞാൻ പറഞ്ഞു.
"യെഹ് വാട്സപ്പ് നമ്പർ ഹെ ന? മേം അഭീ ബേച്ചേഗ... "
നിമിഷങ്ങൾക്കുള്ളിൽ കുളു മണാലി മൂന്ന് ദിവസത്തെ യാത്രയുടെ ഒരു രൂപരേഖ മഹേഷ് അയച്ചു തന്നു.കുളു വേണ്ട എന്നറിയിച്ചപ്പോൾ രണ്ട് ദിവസത്തിന് 6500 രൂപയ്ക്ക് ടാക്സി ഉറപ്പിച്ചു. 9000 രൂപയായിരുന്നു ഞാൻ ആദ്യം ഡീലാക്കിയ ഡ്രൈവർ പറഞ്ഞത്.
അങ്ങനെ മെയ് 29 ൻ്റെ പകൽ കറക്കങ്ങൾ മുഴുവൻ തീർത്ത് രാത്രി 8.10 ന് കാശ്മീരി ഗേറ്റിലെ ഐ.ജി.ബി.ടി യിൽ നിന്നും ഞങ്ങളുടെ കന്നി മണാലി യാത്ര ആരംഭിച്ചു. വഴിയിൽ നിന്ന് വാങ്ങിയ ബ്രെഡ് ഓംലെറ്റ് ആയിരുന്നു രാത്രി ഭക്ഷണം. രാവിലെ ഏഴ് മണിക്ക് മണാലിയിൽ ഞങ്ങളിറങ്ങുമ്പോൾ അവിടെ മഴ പെയ്തു കൊണ്ടിരിക്കുകയായിരുന്നു.
(തുടരും..)
1 comments:
മെയ് 27 ന് ഡൽഹിയിൽ ഇറങ്ങി ഒന്ന് കറങ്ങിയ ശേഷം റൂമിലേക്ക് പോകാനായി മോളെ കാത്ത് നിൽക്കെ ഒരു അജ്ഞാത നമ്പറിൽ നിന്നും എനിക്ക് ഒരു വിളി വന്നു.
Post a Comment
നന്ദി....വീണ്ടും വരിക