ബ്ലഡി മൂൺ

"കുഞ്ഞിമ്മോ..." വീടിൻ്റെ ഗേറ്റ് കടന്ന ഉടനെ ആബു മാസ്റ്റർ ഭാര്യയെ നീട്ടി വിളിച്ചു.

"എന്തെയ്നു..?" ഉപ്പ് മാവിൽ ഉപ്പ് കൂടിയതിൻ്റെ വിമ്മിഷ്ടത്തിൽ നിന്ന കുഞ്ഞിമ്മു വിളി കേട്ടു.

"കുഞ്ഞിമ്മോ...കുഞ്ഞിമ്മോ..." ഭാര്യയുടെ ഉത്തരം കേൾക്കാതെ ആബു മാസ്റ്റർ വീണ്ടും വിളിച്ചു. ഭർത്താവിൻ്റെ വിളിയിൽ എന്തോ പന്തികേട് തോന്നിയതിനാൽ കുഞ്ഞിമ്മു അടുക്കളയിൽ നിന്ന് കോലായിലേക്ക് ധൃതിയിൽ നടന്നു. മാഷ് ഗേറ്റ് കടന്ന് നടന്നു വരുന്നത് കുഞ്ഞിമ്മു കണ്ടു.

"എന്തിനാ മന്സാ, ഇങ്ങനെ വിളിച്ച് കൂവി വരുന്നത്? പുറത്തൊരു ടോയ്ലറ്റ് ഉണ്ടാക്കീട്ടുണ്ടല്ലോ?" ആബു മാസ്റ്ററുടെ വിളിയുടെ പ്രൈമറി ഉദ്ദേശം അറിയാവുന്ന കുഞ്ഞിമ്മു ചോദിച്ചു.

"എടീ....ഇന്നത്തെ ദിവസത്തിൻ്റെ പ്രത്യേകത നിനക്കറിയോ?"

'ങേ !! അങ്ങാടിയിൽ പോകും വരെ ഒരു പ്രത്യേകതയും ഈ ദിവസത്തിന് ഇല്ലായിരുന്നല്ലോ...എന്താ ഇപ്പോ പെട്ടെന്നൊരു പ്രത്യേകത ഉണ്ടായത് ?' കുഞ്ഞിമ്മു ആലോചിച്ചു.

"ങാ... അതിനാ രാവിലെ പത്രം വായിക്കണം എന്ന് പറയുന്നത്..." ആബു മാസ്റ്റർ ഭാര്യയെ ഒന്നിരുത്താൻ ശ്രമിച്ചു.

"എന്നിട്ടിപ്പോ അങ്ങാടിയിൽ പോയപ്പോഴാണല്ലോ ഈ പത്രാസുകാരന് ഈ ദിവസത്തിൻ്റെ പ്രത്യേകത തിരിഞ്ഞത്?"

"ഓ.... അത് പിന്നെ..." ആബു മാസ്റ്റർ നിന്ന് പരുങ്ങി.

"ങാ... അത് പോട്ടെ... ആ പ്രത്യേകത എന്താന്ന് പറയൂ..ഞാനും കേൾക്കട്ടെ ...."

"അത്...അത്..." ആബു മാസ്റ്റർ പറയാൻ വന്ന കാര്യം ഒരു നിമിഷം മറന്ന് പോയി.

"ഇന്ന് ഞായറാഴ്ചയാണ്... സൺഡേ ഹോളിഡേ .... ഇതാണ് എനിക്കറിയാവുന്ന ഈ ദിവസത്തിൻ്റെ പ്രത്യേകത.." മുഖത്ത് ഒരു വക്രച്ചിരിയോടെ കുഞ്ഞിമ്മു പറഞ്ഞു.

"യെസ്... അത് തന്നെ... ഇന്ന് ചതയ ദിനം...നോട്ട് ഓൺലി എ ഹോളിഡേ ബട്ട് ആൾസൊ എ ഹോളീ ഡേ"

"അ... അ... ആ... അങ്ങാടിയിൽ വച്ച് പഴയ ഇംഗ്ലീഷ് മാസ്റ്ററെ കണ്ടിരുന്നോ? രാവിലെ തന്നെ ഒരു ബട്ടോൺലി നൊട്ടാൾസോ ? "

"അത്... ഇന്ന് ചന്ദ്രൻ ഭൂമിയുടെ നിഴലിൽ ചതയും ..."

"എന്താവും ന്ന്?"

"ചതയും ന്ന്..."

"അതാണോ നിങ്ങൾ പറഞ്ഞ ചതയ ദിനം ?" കുഞ്ഞിമ്മു ചോദിച്ചു.

"അതാണോ എന്നറിയില്ല.... പക്ഷേ ഇന്ന് പൂർണ്ണ ചന്ദ്രഗ്രഹണ ദിവസമാണ് ..."

"അതിന് ?"

"അപ്പോൾ ആകാശത്ത് ചില പോക്കിരിത്തരങ്ങൾ നടക്കും.."

"ങാ... ബഡായി ആണെങ്കിലും കേൾക്കട്ടെ.."

"സൂര്യൻ ദേ നൂറ് സ്പീഡിൽ ചന്ദ്രൻ്റെ നേരെ ഇങ്ങനെ ഒരു വരവാ....." ആബു മാസ്റ്റർ കുതിരവട്ടം പപ്പു  കളിച്ച് കാണിച്ചു.

"എന്താ ചന്ദ്രൻ സൂര്യൻ്റെ ബാപ്പാക്ക് വിളിച്ചോ?"

"അതൊന്നും എനിക്കറിയില്ല...പക്ഷേ, നമ്മളെ ഭൂമിയുണ്ടേല്ലോ.. അതിന് ഒന്നൊന്നര ധൈര്യമാ... എന്നെപ്പോലെ..." ആബു മാഷ് ഒന്ന് ഞെളിഞ്ഞു.

"ദേ .... ഒരു പാമ്പ് വരുന്നു ..." കുഞ്ഞിമ്മു പെട്ടെന്ന് പറഞ്ഞു.

"ങ്ങേ !! എവിടെ ?? " ആബു മാഷ് പേടിച്ച് കോലായിലേക്ക് ഓടിക്കയറി.

"ആ... ധൈര്യം ഇപ്പോൾ മനസ്സിലായി...ബാക്കി കൂടി പറയൂ..." കിതക്കുന്ന ആബു മാസ്റ്ററെ നോക്കി ചിരിച്ചു കൊണ്ട് കുഞ്ഞിമ്മു പറഞ്ഞു.

"നൂറ് സ്പീഡിൽ വരുന്ന പാമ്പ്....ഛെ , ചന്ദ്രൻ്റെ നേരെ വരുന്ന സൂര്യൻ്റെ മുമ്പിൽ ഭൂമി അങ്ങ് കയറി നിൽക്കും.."

"അയ്യോ.... അപ്പോ സൂര്യൻ ഭൂമിയെ ഇടിച്ച് പാപ്പറാക്കില്ലേ?"

"പിന്നല്ലാതെ .... ഭൂമിയുടെ ചോര തെറിച്ച് ചന്ദ്രനങ്ങോട്ട് ചുവയ്ക്കും .... ചോരച്ചന്ദ്രനാവും...അതാണ് ബ്ലഡി മൂൺ....."

"ബ്ലഡി സൺ അല്ലേ?നിങ്ങളെന്തിനാ ചന്ദ്രനെ തെറിവിളിക്കുന്നത് ?"

"തെറി വിളിച്ചതല്ല, ബ്ലഡി മൂൺ എന്ന് പറഞ്ഞാൽ ചോരച്ചന്ദ്രൻ"

"എന്നിട്ടിപ്പോൾ ആകാശത്ത് ചന്ദ്രനെ കാണുന്നില്ലല്ലോ..?" ആകാശത്തിലേക്ക് നോക്കി കുഞ്ഞിമ്മു പറഞ്ഞു.

"ഇത് ഇന്ന് രാത്രി നടക്കാൻ പോകുന്ന കാര്യമാ പറഞ്ഞത് "

"എത്ര മണിക്ക് ?"

"രാത്രി പന്ത്രണ്ടരക്ക് ശേഷം .."

"ങാ... നടന്നത് തന്നെ... പണ്ട് ഇതേ പോലെ സൂര്യഗ്രഹണം കാണാൻ എന്നും പറഞ്ഞ് വയനാട്ടിൽ പോയി സമയവും കാശും കളഞ്ഞത് ഓർമ്മയില്ലേ?"

"ഉം..." ആബു മാസ്റ്റർ മൂളി.

"ഇനി ചന്ദ്രഗ്രഹണം എന്നും പറഞ്ഞു്  വെറുതെ ഉറക്കം കൂടി കളയണ്ട... നിങ്ങളെ നിലവിളി കേട്ടപ്പോ ഞാൻ കരുതി വല്ല സ്വർണ്ണനിധിയും കിട്ടിയോ ന്ന്..."

"ഉം" ആബു മാസ്റ്റർ വീണ്ടും മൂളി.

"ബഡായി കേട്ടിരുന്ന് സമയം പോയി...ഇന്നിനി ബ്രേക്ക് ഫാസ്റ്റ് നോട്ട് ഒൺലി ഉപ്പ് മാവ് ബട്ട് ആൾസൊ ഉപ്പ് കൂടിയത് ...''

രാവിലെ പറ്റിയ കൈപ്പിഴയിൽ നിന്ന് കുഞ്ഞിമ്മു നൈസായി തലയൂരി.