2025 - ഒരു പിൻ നോട്ടം

2025 ജനുവരി ഒന്ന് ഒരു വർക്കിംഗ് ഡേ ആയിരുന്നു. പല വർഷങ്ങളിലും ചെയ്യാറുള്ള പോലെ ഞാൻ അന്ന് ലീവാക്കി. മുൻ സഹപ്രവർത്തകൻ്റെ വിവാഹത്തിൽ പങ്കെടുക്കാനാണ് ഇത്തവണ ലീവെടുത്തത്. 2025 ലെ അവസാന പ്രവൃത്തി ദിവസമായ ഡിസംബർ മുപ്പത്തി ഒന്നിനും ലീവെടുത്ത് കൊണ്ട് ഞാൻ ഈ കലണ്ടർ വർഷത്തിലെ ഔദ്യോഗിക ജീവിതത്തിന് വിരാമമിട്ടു.

അങ്ങനെ ഒരു വർഷം കൂടി ജീവിത പുസ്തകത്തിൽ നിന്ന് അടർന്ന് പോയി. പുതുവർഷം നൽകിയ പ്രതീക്ഷകളും സ്വപ്നങ്ങളും എത്രത്തോളം സഫലമായി എന്നതും പ്രതീക്ഷക്കപ്പുറം എന്തെല്ലാം സംഭവിച്ചു എന്നതും തിരിഞ്ഞു നോക്കുന്നത് പുതിയ വർഷത്തിന് ദിശാബോധം നൽകാൻ ഉപകരിക്കും എന്നാണ് എൻ്റെ അനുഭവം. കഴിഞ്ഞ വർഷത്തിലേക്കുള്ള ഒരു പിൻ തിരിഞ്ഞ് നോട്ടമാണ് ഇവിടെ പോസ്റ്റ് ചെയ്യുന്നത്.

യാത്രകളുടെ വർഷമായിരുന്നു എനിക്ക് 2025. ഫാമിലി യാത്രകളും കൂട്ടുകാരുടെ കൂടെയുള്ള യാത്രകളും സഹപ്രവർത്തകരുടെ കൂടെയുള്ള യാത്രകളും വിദ്യാർത്ഥികളുടെ കൂടെയുള്ള യാത്രകളും കൊണ്ട് സമ്പന്നമായിരുന്നു പോയ വർഷം. ഒരു വർഷത്തിൽ രണ്ട് തവണ കാശ്മീരിൽ പോയതടക്കം മൂന്ന് തവണ ഡൽഹിയിൽ പോയി എന്നത് ഇപ്പോഴും എനിക്ക് വിശ്വസിക്കാൻ കഴിയുന്നില്ല.

ഈ വർഷം ഹജ്ജ് യാത്രക്കാണ് പ്രഥമ പരിഗണന നൽകുന്നത്. അപേക്ഷ സമർപ്പിച്ചിട്ടുണ്ടെങ്കിലും വെയിറ്റിംഗ് ലിസ്റ്റിൽ ഏറെ പിന്നിലാണ്.പോയ വർഷത്തെ യാത്രകളുടെ ലിസ്റ്റ് താഴെ കൊടുക്കുന്നു.

1. 1921 പൈതൃക യാത്ര - ഫാമിലി
2. ജാനകിക്കാട് - ഫാമിലി
3. മറൈൻ വേൾഡ്, ചാവക്കാട് - ഫാമിലി
4. കൊടുങ്ങല്ലൂർ - സഹപ്രവർത്തകർ
5. സബർമതി ജയ്സാൽമീർ കാശ്മീർ ഡൽഹി - വിദ്യാർത്ഥികളുടെ കൂടെ സ്റ്റഡി ടൂർ
6. ഡൽഹി മണാലി - ഫാമിലി
7. നൂർ ലേക്ക് - സോളോ
8. കക്കാടംപൊയിൽ - SSC സഹപാഠികൾ
9. കാശ്മീർ ഡൽഹി - SSC സഹപാഠികൾ
10. പ്ലാനറ്റേറിയം - ഫാമിലി
11. അട്ടപ്പാടി - ഫാമിലി
12. കൊച്ചി - ഫാമിലി

യാത്രകൾ പോലെ, എൻ്റെ മറ്റൊരു ഹോബി വായനയാണ്.ആറ് ഇംഗ്ലീഷ് പുസ്തകങ്ങൾ അടക്കം അറുപത് പുസ്തകങ്ങളായിരുന്നു ഈ വർഷത്തെ വായനാ ലക്ഷ്യം. അത് സാക്ഷാൽക്കരിക്കാൻ സാധിച്ചു. അറുപത് പുസ്തകങ്ങളിലെ 7040 പേജുകളിൽ കൂടി ഞാൻ കടന്നു പോയി. ഈ വർഷവും ലക്ഷ്യത്തിൽ മാറ്റം വരുത്താൻ ഉദ്ദേശിക്കുന്നില്ല.കഴിഞ്ഞ വർഷം വായിച്ച പുസ്തകങ്ങളുടെ ലിസ്റ്റ് താഴെ കൊടുക്കുന്നു.

1. Sapiens - A brief history of humankind -  Yuval Noah Harari
2. സാപിയൻസ് - മനുഷ്യകുലത്തിൻ്റെ ലഘുചരിത്രം - യുവാൽ നോവാ ഹരാരി 
3. അപൂർവങ്ങളിൽ അപൂർവം - അഡ്വ എ നസീറ  
4. എല്ലാവരും പ്രിയപ്പെട്ടവർ - രാധാകൃഷ്ണൻ കാര്യക്കുളം
5. Akbar Birbal Stories - Reshmi Jaiswal 
6. ഇതര മതസ്ഥരോടുള്ള സമീപനം - Dr. റാഗിബ് സർജാനി 
7. ഓഷ്യാനയിലെ ഗംട്രീ - അനിൽ കോനാട്ട് 
8. ജലസ്പർശം  - ഔസേപ്പ് ചിറ്റക്കാട് 
 9. പാതിരാ സൂര്യന്റെ നാട്ടിൽ - S K പൊറ്റക്കാട്ട്  
10. സോനാമാർഗ്ഗിലെ ചെമ്മരിയാടുകൾ - എസ്. സരോജം
11. വേരുകൾക്കിടയിലൂടെ  (കവിതകൾ) - ഔസേഫ് ചിറ്റക്കാട് 
12. മഷി പടർന്ന ചൂണ്ടുവിരൽ - രാജൻ താന്നിക്കൽ
13. അടിമ പറഞ്ഞത് - ഔസേഫ് ചിറ്റക്കാട്  
14. വാനപ്രസ്ഥം - M T വാസുദേവൻ നായർ
15. വടക്കൻ കാറ്റിൻ്റെ സമ്മാനങ്ങൾ - ബി.മുരളി
16. തൂക്കുമരത്തിൻ്റെ തണലിൽ - മുഹമ്മദ്   ജാഫർ താനേശ്വരി 
17. റെയിൽവെ കുട്ടികൾ -  ഈഡിത്ത് നെസ്ബിറ്റ്
18.  സിന്ദ് ബാദിൻ്റെ സാഹസിക യാത്രകൾ - അബ്ദുല്ല പേരാമ്പ്ര 
19. വെനീസിലെ വ്യാപാരി - ബീന ജോർജ്ജ്  
20. വേരിറക്കം (കവിതകൾ ) - ഔസേഫ് ചിറ്റക്കാട് 
21. താഴ്ന്നു പറക്കാത്ത പക്ഷി (കവിതകൾ) - വിഷ്ണു പ്രിയ പൂഞ്ഞാർ 
22. അമ്പിളി അമ്മാവൻ്റെ വീട്ടിലേക്ക് - ചുനക്കര ഗോപാലകൃഷ്ണൻ
23. റിപ് വാൻ വിങ്കിൾ മറ്റു കഥകളും - വാഷിംഗ്ടൺ ഇർവിങ്ങ് 
24. ഈശ്വരാ വഴക്കില്ലല്ലോ - സലീം കുമാർ
25. പടച്ചോൻ്റെ ചിത്ര പ്രദർശനം - P ജിംഷാർ
26. അരയാൽ ദൈവവും ഏഴ് ദൂതന്മാരും - ഔസേഫ് ചിറ്റക്കാട്
27. മുഖംമൂടികൾ - ഉറൂബ് 
28. മാനസ - ജി.രമണി അമ്മാൾ
29. ഒറ്റയ്ക്കൊരു മഴ നനഞ്ഞ യാത്ര - അത്തീഫ് കാളികാവ്
30. സ്വർഗ്ഗവാതിൽ പക്ഷി - മാത്യുമറ്റം
31. ഖുർആൻ കഥകൾ - അബൂസലീം അബ്ദുൽ ഹയ്യ്
32. വേഷം മാറി വന്ന ഖലീഫ ഉമറും മറ്റു ഗുണപാഠ കഥകളും - ശംസുദ്ദീൻ
33. തിരുവാഭരണങ്ങൾ - ഔസേഫ് ചിറ്റക്കാട്
34. 1921 പോരാളികൾ വരച്ച ദേശ ഭൂപടങ്ങൾ - പി സുരേന്ദ്രൻ
35. കുട്ടിക്കളികൾ - സനിൽ പി തോമസ്
36. ഇസ്ലാമിലെ മാതൃകാ വനിതകൾ - അബൂബക്കർ നദ്‌വി
37. എന്ത്? എന്തുകൊണ്ട്? എങ്ങനെ? കഥകളിലൂടെ - അബ്ദുൽ ജബ്ബാർ
38. മുൾത്താനിലെ കള്ളൻ - അശ്റഫ് കീഴുപറമ്പ്
39. ആപ്പിൾക്കുട്ടനും കാട്ടാനക്കൂട്ടവും - സിപ്പി പള്ളിപ്പുറം
40. ഉണക്കപ്പുട്ടും തേങ്ങാപ്പീരയും - അനീഷ് സോമൻ
41. മഴ നനഞ്ഞ് രണ്ടു പേർ -  M A സുഹൈൽ  
42. സ്വാതന്ത്ര്യ സമരം നഷ്ടപ്പെട്ട താളുകൾ - 
43. അഞ്ചു നേരത്തെ നമസ്കാരം ഖുർആനിൽ - C N അഹ്മദ് മൗലവി
44. നക്ഷത്രങ്ങളില്ലാത്ത രാത്രി - അജയകുമാർ ജി
45. ഹിരോഷിമയും നാഗസാക്കിയും - P P ഷിബു 
46. സൈമൺ കമ്മീഷനും ഭഗത് സിംഗിൻ്റെ രക്തസാക്ഷിത്വവും - K തായാട്ട് 
47. രാക്ഷസൻ്റെ ചിരി - തിക്കോടിയൻ 
48. മൂക്കില്ലാ രാജ്യത്ത് - C P സുഹ്റ
49. ഹജ്ജ് യാത്രയിലെ സുകൃതപ്പൂക്കൾ - അബ്ദു ചെറുവാടി
50. ഞങ്ങളുടെ പ്രിയപ്പെട്ട കഥകൾ - അബു ഇരിങ്ങാട്ടിരി
51. Elven Minutes - Paulo Coelho
52. ബിലാലുബ്നു റബാഹ് - ശൈഖ് മുഹമ്മദ് കാരക്കുന്ന് 
53. കൽക്കണ്ടക്കഥകൾ - മനു പ്രതാപ്
54. കൂമ്പെടുക്കുന്ന മണ്ണ് - ഉറൂബ്
55. Aesop's Fables - Resmi Jaiswal
56. കുഞ്ഞിക്കൂനൻ - പി നരേന്ദ്രനാഥ്
57. When Breath becomes Air - Paul Kalanithi  
58. ലോകസുന്ദരൻ - ടി.കെ. ഉബൈദ്
59. Best of Tenali Raman - Syam Dua
60. ഉടൽവഴികൾ - ഗ്രേസി

പുസ്തകത്തെപ്പറ്റിയുള്ള എന്റെ വായനാനുഭവം സാധാരണ എഴുതാറുണ്ട്. ഇത്തവണ ചിലത് മാത്രമേ എഴുതിയിട്ടുള്ളൂ. അവ ആ പുസ്തകങ്ങളുടെ പേരിൽ ക്ലിക്ക് ചെയ്താൽ വായിക്കാം.

ഔദ്യോഗിക ജീവിതത്തിലെ ഈ വർഷത്തെ മറ്റൊരു നാഴികക്കല്ലായിരുന്നു അടിസ്ഥാന ശമ്പള വർദ്ധനവ്. 2004 ൽ സാങ്കേതിക വിദ്യാഭ്യാസ വകുപ്പിൽ സർവ്വീസിൽ പ്രവേശിക്കുമ്പോൾ 2275 രൂപ ആയിരുന്നു എൻ്റെ അടിസ്ഥാന ശമ്പളം. സ്വർണ്ണം പവന് 3000 രൂപയും. ഈ വർഷം എൻ്റെ അടിസ്ഥാന ശമ്പളം ഒരു ലക്ഷം കടന്നു. സ്വർണ്ണവിലയും ഒരു ലക്ഷം കടന്നതിനാൽ വർദ്ധന സ്വാഭാവികം മാത്രം എന്ന് കരുതുന്നു.

യാത്രയ്ക്കും വായനക്കും ഒപ്പം അടുക്കള പച്ചക്കറി കൃഷിയും ഹോബിയായി തുടരുന്നു. ബട്ട്, ഈ വർഷം വിള വളരെ കുറഞ്ഞു. വീട്ടാവശ്യത്തിന് അല്പമെങ്കിലും കിട്ടിയത് കോവലും വഴുതനയും പയറും മാത്രമാണ്.  ഫലവർഗ്ഗങ്ങളിൽ മാങ്ങ നന്നായി ഉണ്ടായി. വിയറ്റ്നാം ഏർളി പ്ലാവിൽ നിന്ന് നാൽപത്തിയെട്ട് ചക്കകളും കിട്ടി.

ഞാൻ കാറോടിക്കാൻ തുടങ്ങിയിട്ട് ഏതാണ്ട് ഇരുപത് വർഷമായി. ഇപ്പോഴും ഡ്രൈവിംഗിൻ്റെ പല ഗുട്ടൻസുകളും എനിക്ക് പിടിയില്ല. പുതിയ ഹൈവേകളിൽ പാലിക്കേണ്ട വേഗതാരീതികളെപ്പറ്റിയും ധാരണയില്ല. എങ്കിലും ജീവിതത്തിലാദ്യമായി മണിക്കൂറിൽ 110 കിലോമീറ്റർ (110 km/hr) എന്ന വേഗതയിൽ ഞാൻ കാർ ഡ്രൈവ് ചെയ്തു.

പാഠ്യ പാഠ്യേതര പ്രവർത്തനങ്ങളിൽ നാല് മക്കളും അവരുടെതായ മുദ്രകൾ പതിപ്പിച്ച ഒരു വർഷമാണ് കടന്ന് പോയത്. മൂത്ത മകൾ വിവാഹ ശേഷം, ഒരു സർക്കാർ ജോലി എന്ന ലക്ഷ്യത്തോടെ കഠിന പ്രയത്നത്തിലാണ്. ബി.എഡ് പഠനം പൂർത്തിയാക്കി, സ്കൂൾ അദ്ധ്യാപക യോഗ്യത പരീക്ഷയായ SET,കെ.ടെറ്റ് കാറ്റഗറി രണ്ട്, മൂന്ന് എന്നിവ പാസ്സായി. രണ്ടാമത്തെ മകൾ ലുഅ ആദ്യമായി അവളുടെ പഠന വിഷയവുമായി ബന്ധപ്പെട്ട ഒരു ഇൻ്റർനാഷനൽ കോൺഫറൻസിൽ പങ്കെടുത്തു. മൂന്നാമത്തെ മകൾ ലൂന ജില്ലാ സാമൂഹ്യ ശാസ്ത്ര മേള വർക്കിംഗ് മോഡൽ വിഭാഗത്തിൽ എ ഗ്രേഡ് നേടി.നാലാമത്തെ മകൻ ലിദു അലിഫ് അറബിക് ക്വിസ് മത്സരത്തിലും സ്കൂൾ അറബിക് കലോത്സവ  ക്വിസ് മത്സരത്തിലും സബ്ജില്ലാ തലത്തിൽ മത്സരിച്ച് എ ഗ്രേഡ് നേടി.കൂടാതെ ബാലഭൂമിയിലെ വിവിധ മത്സരങ്ങളിലും അവന് സമ്മാനം കിട്ടി.

കഴിഞ്ഞ വർഷം നീന്തൽ പരിശീലിപ്പിച്ച പോലെ 2025ലെ വേനലവധി ഫലപ്രദമായി ഉപയോഗിക്കാൻ മക്കൾക്കായി ഞാൻ കണ്ടെത്തിയത് കോഴിക്കോട് ഹരിതം ബുക്സിൻ്റെ റീഡിംഗ് ചലഞ്ച് മത്സരമായിരുന്നു. ലിദുവും ലൂനയും രണ്ട് മാസം കൊണ്ട് ഇരുപത് പുസ്തകങ്ങൾ വീതം വായിക്കാൻ ചലഞ്ച് ചെയ്തു. ലൂന മോൾ കൃത്യം എണ്ണം തികച്ചപ്പോൾ ലിദു മോൻ ഞങ്ങളെ എല്ലാവരെയും ഞെട്ടിപ്പിച്ചു. അവൻ നൂറ് പുസ്തകങ്ങൾ വായിച്ച് മുഴുവനാക്കി. രണ്ട് പേർക്കും പുസ്തകങ്ങളും സർട്ടിഫിക്കറ്റും സമ്മാനമായി കിട്ടി. പത്രത്തിൽ ഫോട്ടോയും വാർത്തയും വന്നതോടെ സ്കൂളിലും കുടുംബത്തിലും ലിദു മോൻ താരമായി.

ഫേസ്ബുക്ക്, ഇൻസ്റ്റാഗ്രാം,ബ്ലോഗ്,വ്ലോഗ് തുടങ്ങീ സാമൂഹ്യ മാധ്യമങ്ങളിൽ ഈ വർഷവും ഞാൻ വളരെ സജീവമായിരുന്നു. പലരും ഫേസ്ബുക്കിൽ എന്നും കാണുന്നതായും സൂചിപ്പിച്ചു. റീൽസ് ,സ്റ്റോറി, പോസ്റ്റുകൾ, ഗ്രൂപ്പ് പോസ്റ്റുകൾ തുടങ്ങീ എല്ലാ രീതിയിലും എഫ് ബി യിൽ സാന്നിദ്ധ്യം നിലനിർത്താൻ സാധിച്ചു.കഴിഞ്ഞ വർഷങ്ങളിലെപ്പോലെ ഈ വർഷവും ബ്ലോഗിൽ നൂറ് പോസ്റ്റ് തികച്ചു. .വ്ലോഗിൽ സബ്സ്ക്രൈബർമാരുടെ എണ്ണം അര ലക്ഷം കടന്നു.പുതിയ വർഷത്തിൽ ഇത് അറുപതിനായിരം ആയി ഉയർത്തണം എന്നാഗ്രഹിക്കുന്നു.ടെലഗ്രാം ഉപയോഗം കുറവായതിനാൽ ഫോളോവേഴ്സിൻ്റെ എണ്ണം താഴോട്ട് പോന്നു.

ഏതാനും ചില സാഹിത്യ മത്സരങ്ങളിൽ മാത്രമാണ് ഇത്തവണ ഞാൻ പങ്കെടുത്തത്. അവയിൽ പേരക്ക ബുക്സിൻ്റെ കുറുങ്കഥാ മത്സരത്തിൽ മൂന്നാം സ്ഥാനം നേടാനായത് മാത്രമാണ് നേട്ടം. ഈ വർഷം പുതിയ ഒരു പുസ്തകം പ്രസിദ്ധീകരിക്കണം എന്നാണ് ഉദ്ദേശിക്കുന്നത്. ഭാര്യ കൗൺസലിംഗ് കോഴ്സ് ഡിപ്ലോമ പൂർത്തിയാക്കി ആ രംഗത്തേക്ക് പതിയെ പ്രവേശിച്ചു കൊണ്ടിരിക്കുന്നു.

2025 ജനുവരി ഒന്നിന് എൻ്റെ സഹപ്രവർത്തകരിൽ ഒരു വിഭാഗം എൻ്റെ വീട്ടിൽ ഒരു സൗഹൃദ സന്ദർശനം നടത്തിയിരുന്നു. ഇതിൻ്റെ തുടർച്ചയായി ഈ വർഷം നിരവധി അങ്ങോട്ടുമിങ്ങോട്ടുമുള്ള സുഹൃദ് സന്ദർശനങ്ങൾ നടന്നു. രാജസ്ഥാൻ സ്വദേശി അമീനും കുടുംബവും എൻ്റെ വീട്ടിൽ വന്നതും ഞാനും സഹപാഠികളും കാശ്മീരിലെ എൻ്റെ സുഹൃത്തിൻ്റെ വീട്ടിൽ പോയതും ഈ വർഷത്തെ മറക്കാനാവാത്ത അനുഭവങ്ങളാണ്.

കഴിഞ്ഞു പോയതിനെപ്പറ്റി ചിന്തിക്കരുത് എന്ന് പലരും പറയാറുണ്ട്. ചിന്തിക്കാം, പക്ഷേ അതിൻ്റെ പേരിൽ ദുഃഖിക്കരുത് എന്നാണ് എൻ്റെ അഭിപ്രായം. വിലയിരുത്തലുകൾ മുന്നോടുള്ള പ്രയാണത്തിന് കൂടുതൽ ലക്ഷ്യബോധം നൽകും എന്നാണ് എൻ്റെ വിശ്വാസം. പുതിയ വർഷവും സുഖ ദുഃഖ സമ്മിശ്രമായി മുന്നോട്ട് പോകും എന്ന് തന്നെയാണ് പ്രതീക്ഷ. എല്ലാവർക്കും പുതുവത്സരാശംസകൾ.